کراچی کے علاقے قائد آباد میں مسلح افراد درزی کی دکان سے 80 سوٹ لے کر فرار ہو گئے۔یہ انوکھی واردات قائد آباد میں بہادر علی نامی درزی کی دکان پر ہوئی۔بہادر علی نے بتایا کہ 19 مارچ کو صبح ساڑھے 4 بجے 2 نامعلوم مسلح افراد دکان پر آئے اور گن پوائنٹ پر سلے ہوئے 80 جوڑے لے کر فرار ہو گئے۔بہادر علی نے بتایا کہ مسلح افراد پہلے سے طے شدہ منصوبے کے تحت آئے تھے کیونکہ وہ ہم سے موبائل یا پیسے وغیرہ کچھ بھی نہیں لے کر گئے بلکہ صرف سلے ہوئے سوٹ لے کر گئے ہیں۔بہادرعلی نے بتایا کہ انہوں نے ڈکیتی سے متعلق شاہ لطیف تھانے میں درخواست جمع کروائی ہے لیکن ابھی تک کوئی کارروائی نہیں کی گئی ہے۔متاثرہ درزی نے بتایا کہ ان کے ساتھ ساتھ وہ لوگ جن کے سوٹ ڈکیت دکان سے لے کر گئے ان کی بھی عید خراب ہو گئی وہ بھی ان کے پاس آ رہے ہیں اور اتنے سارے لوگوں کو اپنی موجودہ صورتِ حال سمجھانا میرے لیے بہت مشکل ہو گیا ہے۔ ان کا کہنا تھا کہ اس ڈکیتی میں تقریباََ 5 لاکھ روپے کا نقصان ہوا ہے.
