تربیلہ ڈیم میں مسافروں سے بھری کشتی دلدل میں پھنس گئی تاہم ضلعی انتظامیہ نے کشتی میں سوار خواتین اور بچوں سمیت تمام 80 مسافروں کو ریسکیو کرلیا۔تربیلا جھیل میں مسافروں سے بھری ہوئی کشتی میں خواتین اور بچوں سمیت 80 مسافر موجود تھے .تربیلہ ڈیم میں پانی کی سطح کم ہونے کے باعث مسافروں سے بھری کشتی دلدل میں پھنس گئی تھی .کشتی مسافروں کو لے کر تورغر سے ہری پور آرہی تھی اور چاندنی چوک کے مقام پر دلدل میں پھنس گئی جو ریسکیو آپریشن میں تاخیر کی وجہ سے 4 گھنٹے تک پھنسے رہے۔مسافروں نے اپنی مدد آپ کے تحت ڈنڈوں اور رسیوں کی مدد سے کشتی کو دلدل سے نکالنے کی کوشش کی تاہم کامیاب نہیں ہوسکے بعدازاں ضلع انتظامیہ نے اسسٹنٹ کمشنر اور ریسکیو ٹیمیں تربیلہ جھیل کی جانب روانہ کردی گئی تھیں۔ریسکیو اداروں کی جانب سے ایک گھنٹے سے زائد آپریشن کے بعد تمام مسافروں کو ریسکیو کرلیا گیا اور انہیں بحفاظت محفوظ مقام پر منتقل کردیا گیا۔
