لاہور میں امریکی قونصلیٹ جنرل نے لاہور اور اس کے مضافات کی فضائی حدود میں ڈرونز دھماکوں اور انڈیا کی جانب سے ممکنہ فضائی حدود میں دراندازی کے پیش نظر اپنے عملے کو محفوظ مقام پر منتقل ہونے کی ہدایت کی ہے۔ امریکی قونصلیٹ کی جانب سےجاری بیان میں کہاگیاکہ لاہورمیں ڈرون گرائےجانےکی اطلاعات ہیں فضائی جارحیت ہوسکتی ہے متاثرہ علاقوں میں موجود امریکی شہری فوری نکل جائیں اگر بحفاظت نکل نہیں سکتے تو کسی محفوظ مقام پر منتقل ہوجائیں۔قونصل خانے کی ویب سائٹ پر جاری بیان میں کہا گیا ہے کہ قونصلیٹ کو یہ ابتدائی اطلاعات بھی موصول ہوئی ہیں کہ حکام ممکنہ طور پر لاہور کے مرکزی ایئرپورٹ کے قریبی علاقوں کو خالی کروا لیں۔انھوں نے امریکی شہریوں کو تجویز دی ہے ایسے امریکی شہری جو ان علاقوں میں موجود ہیں اگر ممکن ہو سکے تو وہاں سے نکل کر کہیں محفوظ مقامات پر منتقل ہو جائیں۔ قبل ازیں ترجمان پاک فوج کا کہنا ہے کہ بھارت کی طرف ڈرون بھیجنا کھلی جارحیت ہے کئی ڈرون مار گرائے تاہم ایک ڈرون لاہور میں فوجی تنصیبات کے قریب گرا زخمیوں میں ایک فوجی کی حالت تشویشناک ہے۔
