کمپنی کی جانب سے جاری ایک رپورٹ میں بتایا گیا ہے کہ ٹک ٹاک نے 2025 کی پہلی سہ ماہی کے دوران پاکستانی صارفین کی لگ بھگ ڈھائی کروڑ ویڈیوز پلیٹ فارم سے ڈیلیٹ کیں۔اس حوالے سے ٹک ٹاک نے 2025 کی پہلی سہ ماہی کے لیے کمیونٹی گائیڈ لائنز کے نفاذ کی رپورٹ جاری کی ہے۔رپورٹ کے مطابق ٹک ٹاک نے جنوری سے مارچ 2025 کے دوران دنیا بھر میں 21 کروڑ 10 لاکھ 97 ہزار 307 ویڈیوز کو کمیونٹی گائیڈ لائنز کی خلاف ورزی پر پلیٹ فارم سے ہٹایا۔یہ ٹک ٹاک پر اپ لوڈ کی گئی ویڈیوز کے تقریباً 0.9 فیصد کے برابر ہے۔ان ویڈیوز میں سے 99.4 فیصد ویڈیوز کو خود کار نظام نے ہٹایا جبکہ ان میں سے 95.8 فیصد ویڈیوز کو صرف 24 گھنٹوں کے اندر پلیٹ فارم سے ہٹا یا گیا جن میں سے 75 لاکھ سے زائد ویڈیوز کو مزید جانچ پڑتال کے بعد بحال کر دیا گیا۔رپورٹ میں بتایا گیا ہے کہ حذف کی گئی 30.1 فیصد ویڈیوز حساس یا بالغ موضوعات پر مشتمل تھی جو مواد کے حوالے سے ٹک ٹاک کی پالیسیوں کے مطابق نہیں تھیں۔11.5 فیصد ویڈیوز میں پلیٹ فارم کے تحفظ اور شائستگی کے معیارات کی خلاف ورزی کی گئی جبکہ 15.6 فیصد پرائیویسی اور سیکیورٹی کی ہدایات کی خلاف ورزی پر مبنی تھیں۔حذف کی گئی ویڈیوز میں سے 45.5 فیصد کو غلط معلومات پھیلانے پر ہٹایا گیا اور 13.8فیصد ویڈیوز کو ترمیم شدہ میڈیا اور آرٹی فیشل انٹیلی جنس سے تیار کردہ مواد کے طور پر شناخت کیا گیا۔
