کراچی میں بے قابو ہیوی ٹریفک نے ایک بار پھر تین قیمتی جانیں نگل لی ہیں۔ بلدیہ ٹاؤن کے علاقے عابد آباد میں ایک واٹر ٹینکر نے کھیل کے میدان میں موجود چار سالہ بچے کو روند ڈالا۔ ننھا عفان موقع پر ہی دم توڑ گیا۔ اہلِ خانہ کا کہنا ہے کہ ٹینکر کنڈیکٹر چلا رہا تھا جو حادثے کے بعد موقع سے فرار ہوگیا۔ بچے کی لاش کو سول اسپتال منتقل کر دیا گیا ہے۔جبکہ دوسرا افسوسناک واقعہ رات گئے نیو چالی کے علاقے میں پیش آیا جہاں ایک ٹریلر کی ٹکر سے موٹر سائیکل سوار دو نوجوان جاں بحق ہو گئے۔ جاں بحق ہونے والوں کی شناخت زاہد اور نور محمد کے ناموں سے ہوئی ہے۔ دونوں نوجوان لیاری عثمان آباد کے رہائشی اور قریبی دوست تھے۔پولیس نے حادثے کے فوری بعد ڈرائیور کو گرفتار کرکے ٹریلر کو تحویل میں لےلیا.
