ملیر ہالٹ پر پیش آئے دلخراش ٹریفک حادثے کے عینی شاہد مشکور خان نے میڈیا سے بات کرتے ہوئے بتایا وہ پیر کو اپنی اہلیہ کے ساتھ ملیر ہالٹ سے گزر رہا تھا ان کی اہلیہ اور انہوں نے واٹر ٹینکر کو تیزی سے آتے دیکھا .انہوں نے بتایا کہ واٹر ٹینکر رانگ وے آرہا تھا تیز رفتار واٹر ٹینکر نے پہلے دو سے چار گاڑیوں کو ٹکر ماری جس کے بعد واٹر ٹینکر فٹ پاتھ سے جمپ کرتا ہوا دوسری طرف گیا اور واٹر ٹینکر نے موٹر سائیکل سوار خاندان کو روند دیا ۔عینی شاہد کے مطابق واٹر ٹینکر موٹر سائیکل کو گھسیٹتا ہوا دور تک لے گیا اور جب میں موقع پر پہنچا تو خاتون جا ں بحق ہوچکی تھی اور اسی دوران نومولود بھی نظر آیا جائے حادثہ پر 2 بزرگ خواتین بھی آگئیں جنہوں نے بچے کو نکالا تو بچہ سانس لے رہا تھا بزرگ خواتین نے ہی بچے کی نال کاٹی.عینی شاہد کے مطابق ایک شہری نومولود کو اٹھا کر قریبی اسپتال کی جانب دوڑا اور میں بھی اسپتال پہنچا پوری امید تھی کی نومولود بچ جائے گا اسپتال کے ڈاکٹرز اور نرسوں نے ہر طرح کی کوشش کی لیکن وہ جانبر نہ ہو سکا، بچے کے ماں اور باپ دونوں موقع پر ہی فوت ہو چکے تھے۔عینی شاہد کا کہنا تھا کہ حادثہ واٹر ٹینکر کے ڈرائیور کی غلفت اور لاپروائی کے باعث پیش آیا کیوںکہ واٹر ٹینکر بہت تیزی سے آرہا تھا عینی شاہد کے مطابق واٹر ٹینکر ڈرائیور نے فرار ہونے کی کوشش کی لیکن لوگوں نے اسے پکڑ لیا۔
