امریکی صدر ڈونلڈ ٹرمپ نے خبردار کیا ہے کہ اگر اسرائیل نے مغربی کنارے کو ضم کرنے کی کوشش کی تو وہ امریکا کی حمایت کھو بیٹھے گا۔ٹرمپ کے مطابق انہوں نے اسرائیلی وزیرِاعظم نیتن یاہو کو واضح پیغام دیا ہے کہ دنیا آپ کے خلاف ہے آپ دنیا سے نہیں لڑ سکتے۔ٹائم میگزین کو دیے گئے انٹرویو میں صدر ٹرمپ نے کہا کہ انہوں نے عرب ممالک سے وعدہ کیا ہے کہ مغربی کنارہ ضم نہیں ہوسکتا۔امریکی صدر نے انٹرویو میں بتایا کہ غزہ کی پٹی میں جنگ رک چکی ہے اور نیتن یاہو کو امن معاہدہ قبول کرنا چاہیے۔انہوں نے کہا کہ اسرائیل دنیا کے مقابلے میں ایک چھوٹی سی جگہ ہے اور قطر پر حملہ اسرائیلی حکمتِ عملی کی ایک بڑی غلطی تھی۔انہوں نے کہا کہ وہ مستقبل میں کسی وقت غزہ کا دورہ کرنے کا ارادہ رکھتے ہیں، جبکہ امید ظاہر کی کہ سعودی عرب رواں سال کے آخر تک ابراہیمی معاہدے میں شامل ہو جائے گا۔واضح رہے کے گذشتہ دنوں اسرائیل نے امن معاہدے کی آڑ میں مغربی کنارے کو اسرائیل میں ضم کرنے سے متعلق بل کے پہلے مرحلے کی اسرائیلی پارلیمنٹ نے منظوری دی تھی۔
