برطانوی حکومت نے اعلان کیا ہے کہ 16 سال سے کم عمر بچوں کو زیادہ کیفین والے انرجی ڈرنکس کی فروخت پر پابندی عائد کی جائے گی۔پابندی کے تحت دکانیں، کیفے، ریسٹورنٹس اور آن لائن ویب سائٹس بچوں کو ایسے انرجی ڈرنکس فروخت نہیں کر سکیں گی جن میں فی لیٹر 150 ملی گرام سے زیادہ کیفین ہو۔برطانوی وزیرِ صحت ویس اسٹریٹنگ نے کہا کہ انرجی ڈرنکس بے ضرر نظر آتے ہیں لیکن یہ بچوں کی نیند، توجہ اور ذہنی سکون کو متاثر کرتے ہیں جبکہ زیادہ شکر والی ڈرنکس دانتوں کو نقصان پہنچاتی ہیں اور موٹاپے میں اضافہ کرتی ہیں۔ انہوں نے کہا کہ جیسے کم عمر بچوں کو شراب اور سگریٹ کی فروخت پر پابندی مؤثر ثابت ہوئی ہے اسی طرح یہ عمر کی بنیاد پر لاگو پالیسی بھی کامیاب ہو گی۔اعداد و شمار کے مطابق 250 ملی لیٹر ایک کولڈ ڈرنک کین میں تقریباً 80 ملی گرام کیفین ہوتی ہے جو ایک ایسپریسو یا 2 کین کولڈ ڈرنک کے برابر ہے البتہ چائے، کافی اور کم کیفین والے مشروبات پر یہ پابندی لاگو نہیں ہو گی۔حکومت نے کہا ہے کہ یہ اقدام فوڈ سیفٹی ایکٹ 1990ء کے تحت ثانوی قانون سازی کے ذریعے نافذ کیا جائے گا۔
