پاکستان اور نیوزی لینڈ کے درمیان کھیلے گئے تیسرے ٹی ٹوئنٹی میں پاکستان نے نیوزی لینڈ کو 9 وکٹوں سے ہرادیا۔حسن نواز پاکستان کی جانب سے ٹی 20 انٹرنیشنل میں تیز ترین سنچری بنانے والے کھلاڑی بن گئے انہیں پلیئر آف دی میچ قرار دیا گیا۔ حسن نواز نے 45 گیندوں پر 105 رنز بنائےآکلینڈ میں کھیلے گئے میچ میں مہمان ٹیم پاکستان نے ٹاس جیت کر میزبان کو پہلے بیٹنگ کی دعوت دی۔شاہین آفریدی نے پہلے ہی اوور میں کیوی بیٹر فن ایلن کو آؤٹ کر دیا۔پہلی وکٹ گرنے کے بعد نیوزی لینڈ نے پلٹ کر جواب دیا اور تیز بیٹنگ کر کے 4 اوورز میں اسکور 43 تک پہنچا دیا جس کے بعد ٹم سائفرٹ 19 رنز بنا کر حارث رؤف کا شکار بن گئے۔دوسری وکٹ گرنے کے بعد بھی نیوزی لینڈ کے بیٹرز نے تیز رن ریٹ کے ساتھ بیٹنگ جاری رکھی اور 9 اوورز میں اسکور 98 تک پہنچا دیا اس دوران مارک چیپمین نے 29 گیندوں پر 1 چھکے اور 7 چوکوں کی مدد سے ففٹی بنائی۔ اگلے اوور کی پہلی ہی گیند پر شاداب خان نے ڈیرل مچل کو 17 رنز پر کیچ آؤٹ کرایا۔پاکستان کے خلاف نیوزی لینڈ کی چوتھی وکٹ 11.5 اوورز میں 135 رنز پر گری جب جیمز نیشم کو 3 رنز پر محمد عباس نے آؤٹ کیا۔اگلے اوور میں پاکستان نے نیوزی لینڈ کی اہم ترین وکٹ 141 رنز پر حاصل کر لی جارحانہ انداز میں بیٹنگ کرنے والے مارک چیپمین 44 گیندوں پر 94 رنز بنا کر شاداب خان کی گیند پر کیچ آؤٹ ہوئے۔اس کے بعد نیوزی لینڈ کی لگاتار 2 گیندوں پر 2 وکٹس 15 ویں اوور میں ابرار احمد نے 164 رنز پر گرائیں۔نیوزی لینڈ کی آٹھویں وکٹ 19 ویں اوور میں 193 اور نویں وکٹ 194 رنز پر گری یہ دونوں وکٹس حارث رؤف کے حصے میں آئیں۔نیوزی لینڈ کی آخری وکٹ 19.5 اوورز میں 204 رنز پر گری۔جواب میں پاکستانی ٹاپ آرڈر نے شاندار کارکردگی کا مظاہرہ کیا، اوپنر محمد حارث 41 بناکر آؤٹ ہوئے جب کہ حسن نواز نے 44 گیندوں پر شاندار سنچری اسکور کی اور کپتان سلمان علی آغا نے ان کا بھرپور ساتھ دیتے ہوئے 31 گیندوں پر 51 رنز بنائے۔ بیٹرز کی تیز بیٹنگ اور پارٹنر شپ کی بدولت پاکستان نے با آسانی میچ 4 اوورز پہلے ختم کر دیا۔حسن نواز 105 اور سلمان آغا 51 رنز بنا کر ناٹ آؤٹ رہے۔
