انسداد دہشت گردی عدالت لاہور نے جناح ہاؤس حملہ کیس میں بانی پی ٹی آئی عمران خان کی بہن علیمہ خان کے بیٹے شاہ ریز خان کی درخواست ضمانت منظور کرلی۔فیصلے کے مطابق شاہ ریزخان کو ضمانت پررہا کرنے کا حکم دیا گیا ہے تاہم ان پر کیس کی مزید تفتیش جاری رہے گی۔ واضح رہے کہ عدالت نے سماعت مکمل ہونے کے بعد فیصلہ محفوظ کیا تھا جو اے ٹی سی کے جج منظرعلی گل نے سنایا۔عدالت نے تمام دلائل سننے کے بعد شاہ ریز خان کی ضمانت منظور کرتے ہوئے رہائی کا حکم دے دیا کیس کی آئندہ سماعت میں مزید شواہد اور تفتیشی رپورٹ پیش کی جائے گی۔عدالت میں سماعت کے دوران ملزم کے وکیل رانا مدثرنے مؤقف اپنایا کہ ایف آئی آر، چالان اور تفتیشی رپورٹس میں شاہ ریزکا نام شامل نہیں ہے وہ واقعے کے وقت چترال میں موجود تھے جس کے بیانِ حلفی اورشواہد عدالت میں پیش کیے گئے ہیں۔سرکاری وکیل نے مؤقف اختیارکیا کہ شاہ ریزکے دوستوں کے سوشل میڈیا اکاؤنٹس سے تصاویرحاصل کی گئی ہیں اگرچہ ملزم کے اپنے اکاؤنٹس پرکچھ نہیں ملا۔
