سعدالرحمان عرف ڈکی بھائی کے نام سے مشہور یوٹیوبر کو موٹر وے پر اسٹنٹ دکھانا مہنگا پڑ گیا۔ڈکی بھائی کے خلاف نیشنل ہائی ویز اینڈ موٹرویز پولیس نے سخت کارروائی کا فیصلہ کرلیا ہے.حال ہی میں یوٹیوبر نے ایک ویڈیو شیئر کی جس میں وہ موٹر وے پر نہ صرف اوور اسپیڈنگ کررہے تھے بلکہ ہاتھ چھوڑ کر گاڑی چلا رہے تھے۔وائرل ہونے والی ویڈیو میں ڈکی بھائی کو گاڑی کے اسٹیئرنگ وہیل پر ٹانگیں رکھے اور آنکھیں بند کیے ہوئے دیکھا جاسکتا ہے جبکہ گاڑی آٹو موڈ پر چل رہی تھی.ان کی یہ ویڈیو اپ لوڈ ہونے کے بعد سوشل میڈیا صارفین کی جانب سے انہیں شدید تنقید کا نشانہ بنایا گیا جس پر موٹر وے پولیس نے حرکت میں آتے ہوئے فوری ایکشن لیا اور یوٹیوبر کے خلاف مقدمہ درج کرلیا ہے .یہ پہلی بار نہیں ہے جب ڈکی بھائی کے خطرناک اسٹنٹس نے انہیں مصیبت میں ڈالا ہے۔ تاہم اس بار پولیس کی جانب سے سنجیدہ کارروائی سے ظاہر ہوتا ہے کہ اب سوشل میڈیا اسٹارز کو ٹریفک قوانین کی خلاف ورزی کی کوئی گنجائش نہیں دی جائے گی۔موٹروے پولیس کے ترجمان کے مطابق ڈکی بھائی کے خلاف غفلت، لاپرواہی سے گاڑی چلانے اور اوور اسپیڈنگ سمیت متعدد الزامات پر مقدمہ درج کرلیا گیا ہے۔ پولیس نے اس معاملے پر اپنے سرکاری سوشل میڈیا اکاؤنٹس سے بھی ایک وضاحتی ویڈیو جاری کی ہے۔
