پانچ ممالک حکومت پاکستان کے کروڑوں ڈالرز کے ڈیفالٹر نکلے۔آڈٹ رپورٹ میں کئے گئے انکشاف کے مطابق سری لنکا، بنگلادیش، عراق، سوڈان اور گنی بساؤ پاکستان کے کروڑوں ڈالرز کے ڈیفالٹر نکلے۔آڈٹ رپورٹ کے مطابق ڈیفالٹر ممالک کی فہرست میں سری لنکا، بنگلا دیش، عراق، سوڈان اور گنی بساو شامل ہیں جن سے حکومت پاکستان 30 کروڑ 45 لاکھ ڈالر ریکور کرنے میں ناکام رہی۔رپورٹ میں کہا گیا کہ پاکستان نے 80 اور 90 کی دہائی میں ان ممالک کو ایکسپورٹ کریڈٹ دیا تھا۔پاکستانی کرنسی میں قرض کی یہ رقم 86 ارب روپے سے زیادہ بنتی ہے۔آڈٹ رپورٹ کے مطابق سال 07-2006 میں بھی آڈیٹر جنرل نے ریکوری کی نشاندہی کی تھی ان پانچ ملکوں کو یاد دہانی کے خط اور ڈیمانڈ نوٹسز بھی بھجوائے گئے۔آڈٹ رپورٹ کے مطابق عراق کے ذمے سب سے زیادہ 23 کروڑ 13 لاکھ ڈالر واجب الادا ہیں جبکہ پاکستان نے سوڈان سے 4 کروڑ 66 لاکھ ڈالر وصول کرنے ہیں بنگلا دیش کے ذمےشوگر پلانٹ اور سیمنٹ کی مد میں 2 کروڑ 14 لاکھ ڈالر ہیں جبکہ پاکستان نے گنی بساو سے 36 لاکھ 53 لاکھ ڈالر وصول کرنے ہیں۔آڈیٹر جنرل کی جانب سے رقم ریکور کرنے کےلیے معاملہ مناسب سطح پر اٹھانے کی سفارش کی گئی ہے۔
