نیشنل سائبر کرائم انویسٹی گیشن ایجنسی کا کہنا ہے کہ معروف یوٹیوبر ڈکی بھائی بیٹنگ ایپ کی ایک پروموشن کے 10 سے 20 ہزار ڈالر لیتے تھے۔ ادارے نے جوا کرانے والی 46 آن لائن ایپس کو غیر قانونی قرار دے کر ان کی فہرست بھی جاری کر دی ہے۔ نیشنل سائبر کرائم انویسٹی گیشن ایجنسی کے مطابق پاکستان ٹیلی کمیونکیشن اتھارٹی کو تمام ایپس کی فہرست فراہم کر دی گئی ہے اور اب سائبر کرائم کی درخواست پر پی ٹی اے تمام غیر قانونی ایپس کو بند کرے گا۔غیر قانونی ایپس میں فاریکس ٹریڈنگ کی کئی نان ریگولیٹڈ ایپس بھی شامل ہیں جن کو اب بلاک کیا جائے گا۔بلاک ہونے والی ایپس میں شہریوں کی ذاتی معلومات اور موبائل نمبر کی تفصیلات دوسروں کو فراہم کر دینے والی ایپس بھی شامل ہیں۔چند روز قبل معروف یوٹیوبر اور ٹک ٹاکر سعد الرحمان عرف ڈکی بھائی کو بھی ایسی ہی جوئے کی ایپلی کیشنز کے ذریعے جوئے کو فروغ دینے پر لاہور ائیر پورٹ سے بیرون ملک جاتے ہوئے گرفتار کیا تھا.ان ایپلیکشنز کے ذریعے جوئے کو فروغ دینے والے درجنوں افراد اس کیس میں شامل تفتیش ہوچکے ہیں یو ٹیوبرز یا سوشل میڈیا انفلوئنسرز کو بیرون ملک بیٹھے بکیے ملوث کرتے ہیں جنہوں نے جوئے کو فروغ دینے کے حوالے سے درجنوں پروگرامز کیے جن کی تعداد 50 سے زائد ہے۔ ڈکی بھائی باہر بیٹھے جواری سے ایک پروگرام کے 10 سے 20 ہزار ڈالرز وصول کرتا تھا اس کے علاوہ بھی ڈکی بھائی بہت کچھ کر رہا تھا جس کی تفتیش جاری ہے۔ایڈیشنل ڈائریکٹر نیشنل سائبر کرائم انویسٹی گیشن ایجنسی سرفراز چوہدری نے بتایا کہ 14 جون کو ایسی ایپ کے خلاف ایک انکوائری شروع کی گئی اور یہ بات سامنے آئی کہ بہت سے ایسے یو ٹیوبرز ہیں جو پاکستان کے مستقبل سے کھیل رہے تھے ان کے اثر میں آنے والے وہ بچے تھے جن کی عمریں چھ سے 16 سال تک ہیں یہ ان کے مستقبل کے ساتھ کھیل رہے تھے اور انہیں مختلف گیمنگ ایپس کے ذریعے جوئے کی لت لگا رہے تھے۔یہ یو ٹیوبرز اپنی لگژری گاڑیوں اور پر تعیش طرز زندگی، بنگلے اور پارٹیاں دکھا کر بچوں کے ذہنوں پر برے اثرات مرتب کر رہے تھے
