دنیا بھر میں لگژری اور منفرد فیشن برانڈ کی پہچان رکھنے والے ارمانی کے بانی معروف اطالوی فیشن ڈیزائنر جورجیو ارمانی 91 برس کی عمر میں چل بسے۔یاد رہے کہ 1975 میں اپنے نام سے برانڈ متعارف کرانے والے جورجیو ارمانی نے ابتدا میں مردانہ لباس کے محدود مجموعے سے سفر شروع کیا لیکن دیکھتے ہی دیکھتے اسے ایک عالمی فیشن سلطنت میں بدل دیا۔ ان کا برانڈ نہ صرف کپڑوں بلکہ جوتوں اور دیگر لگژری مصنوعات کے باعث بھی دنیا بھر میں مشہور ہے جن کی قیمتیں لاکھوں میں ہیں۔ارمانی گروپ نے 4 ستمبر کو اپنے انسٹاگرام اکاؤنٹ پر جاری بیان میں بانی جورجیو ارمانی کے انتقال کی تصدیق کی۔ بیان کے مطابق ارمانی اپنے آخری ایام تک اپنے کام سے جڑے رہے اور اپنے پیاروں کے درمیان پُرسکون انداز میں اس دنیا سے رخصت ہوئے۔ انہیں ان کے ملازمین اور ساتھی ہمیشہ احترام اور محبت کے ساتھ یاد کرتے رہیں گے۔جورجیو ارمانی کے انسٹاگرام اکاؤنٹ پر جاری دوسرے بیان میں بتایا گیا کہ ان کی آخری رسومات 6 ستمبر کو نجی طور پر ادا کی جائیں گی۔کمپنی کی جانب سے بتایا گیا کہ ارمانی نئے کلیکشنز اور آئندہ منصوبوں کے لیے آخری وقت تک سرگرم رہے۔ انگریزی اور اطالوی زبان میں جاری بیان میں کہا گیا کہ ارمانی گروپ میں کام کرنے والے ملازمین ہمیشہ خود کو ایک خاندان کا حصہ سمجھتے تھے۔ جورجیو ارمانی نے ڈیزائنر کی چمک دمک کو کاروباری ہوشیاری کے ساتھ ملایا اور ایک ایسی کمپنی بنائی جو سالانہ تقریباً 2.3 بلین یورو کا کاروبار کرتی ہے۔وہ کچھ عرصے سے علیل تھے اور جون میں میلان مینز فیشن ویک کے دوران اپنے گروپ کے شوز میں شرکت نہ کر سکے تھے، جو ان کے کیریئر میں پہلا موقع تھا جب وہ اپنے کیٹ واک ایونٹس میں شریک نہ ہوئے۔
