امریکی صدر ڈونلڈ ٹرمپ نے کرپٹو کرنسی کے حوالے سے پہلا جامع اور بڑا وفاقی قانون جینیئس ایکٹ پر دستخط کر دیے۔ یہ قانون جمعہ کے روز ایک خصوصی تقریب میں سائن کیا گیا جو کہ ایک دن قبل ایوان نمائندگان سے بعض قدامت پسند اراکین کی مخالفت کے باوجود منظور ہوگیا تھا۔ایوان نمائندگان میں اس قانون کے حق میں 206 ریپبلکنز اور 102 ڈیموکریٹس نے ووٹ دیا۔جینیئس ایکٹ کے نام سے منظور ہونے والے اس قانون کا مقصداسٹیبل کوائنز کے لیے ضابطے وضع کرنا ہے یعنی ایسی کرپٹو کرنسیاں جو امریکی ڈالر یا دیگر قابل اعتماد اثاثوں کے ذریعے مکمل طور پر محفوظ ہوتی ہیں۔یہ قانون اس ہفتے اس وقت تعطل کا شکار ہو گیا تھا جب ایک درجن قدامت پسند ریپبلکنز نے اس کے خلاف طریقہ کار میں رکاوٹ ڈال دی۔ تاہم صدر ٹرمپ نے خود ان اراکین سے فون پر بات کی جس کے بعد بل پر اتفاق رائے ممکن ہوا۔تقریب میں کانگریس کے اراکین کے ساتھ ساتھ رابن ہڈ، ٹیتھر، جیمنی اور دیگر مالیاتی و کرپٹو کمپنیوں کے اعلیٰ حکام نے بھی شرکت کی۔تقریب کے دوران صدر ٹرمپ نے ہنستے ہوئے کہا ہم نے بہت محنت کی یہ ایک بہت اہم قانون ہے جینیئس ایکٹ اور انھوں نے اس کا نام میرے نام پر رکھا۔ یہ واقعی زبردست قانون ہے۔
