امریکی نشریاتی ادارے فاکس نیوز کے مطابق امریکی خفیہ سروس نے صدر کی آمد سے قبل ایک اونچا لکڑی کا مچان دریافت کیا جو طیارے کے بورڈنگ ایریا اور رَن وے کے بالکل سامنے تھا۔خفیہ ادارے کو ایئر فورس ون کے نزدیک ایک مشتبہ اسنائپر نِیسٹ ملا ہے.سیکیورٹی خطرے کے پیشِ نظر صدر ٹرمپ نے معمول کے برعکس ایئر فورس ون کے پچھلے، کم اونچائی والے زینے سے طیارے میں سوار ہونے کا فیصلہ کیا۔ایف بی آئی کے ڈائریکٹر کش پٹیل نے فاکس نیوز سے گفتگو میں تصدیق کی کہ صدر کی واپسی سے قبل یو ایس سیکرٹ سروس کو ایک ایسی بلند جگہ ملی جو ایئر فورس ون کے لینڈنگ زون کے بالکل سامنےتھی۔مقامی امریکی میڈیا کے مطابق لکڑی کا یہ ڈھانچہ اس جگہ سے تقریباً دو سو گز کے فاصلے پر واقع تھا جہاں حال ہی میں ایئر فورس ون کو پارک کیا گیا تھا۔ تعمیراتی سرگرمیوں کے باعث صدارتی طیارہ نجی پروازوں والے حصے کے قریب پارک کیا گیا تھا جس سے یہ جگہ براہِ راست نظر میں آگئی تھی۔ایف بی آئی کے مطابق اس جگہ سے کوئی گولہ بارود یا دھماکا خیز مواد برآمد نہیں ہوا تاہم مشتبہ ڈھانچے کی موجودگی پر فوری طور پر ایئرپورٹ کی سیکیورٹی پروٹوکول کا ازسرنو جائزہ لیا گیا۔ایف بی آئی ڈائریکٹر نے کہا کہ تفتیش کار اس بات کا جائزہ لے رہے ہیں کہ یہ ڈھانچہ کس نے تیار کیا اور کیا اس کا تعلق کسی حالیہ سیکیورٹی بریچ سے تو نہیں۔اس حوالے سے ابھی تک کوئی گرفتاری عمل میں نہیں آئی، تاہم تفتیشی عمل تیزی سے جاری ہے۔اب اس نئے واقعے نے امریکی سیکیورٹی اداروں کو ایک بار پھر چوکنا کر دیا ہے جبکہ ایئرپورٹ کی سیکیورٹی پالیسیوں میں بڑی تبدیلیوں کا امکان ظاہر کیا جا رہا ہے۔
