امریکی عدالت نے صدر ڈونلڈ ٹرمپ کی انتظامیہ کی جانب سے ہارورڈ یونیورسٹی کی بین الاقوامی طلباء کو داخلہ دینے کی اہلیت منسوخ کرنے کا فیصلہ وقتی طور پر معطل کر دیا ہے۔ٹرمپ انتظامیہ نے جمعرات کو ہارورڈ یونیورسٹی کا غیر ملکی طلبا کو داخلہ دینے کا اختیار منسوخ کر دیا تھا۔امریکی ڈسٹرکٹ جج ایلیسن بوروگز نےعبوری حکم نامہ جاری کرتے ہوئے قرار دیا کہ ہارورڈ نے اس پالیسی سے ہونے والے ممکنہ نقصان کو واضح طور پر ثابت کیا ہے اور عدالت اس پر مکمل سماعت سے قبل فیصلہ جاری نہیں کر سکتی۔عدالتی حکم کا اطلاق دو ہفتوں کے لیے ہو گا جبکہ آئندہ سماعتیں 27 اور 29 مئی کو ہوگی۔ہارورڈ یونیورسٹی نے بوسٹن کی فیڈرل کورٹ میں دائر مقدمے میں کہا کہ یہ اقدام نہ صرف امریکی آئین بلکہ وفاقی قوانین کی بھی کھلی خلاف ورزی ہے بین الاقوامی طلباء کے بغیر ہارورڈ یونیورسٹی، ہارورڈ نہیں رہتی۔یونیورسٹی انتظامیہ نے درخواست میں مؤقف اختیار کیا کہ اس اقدام سے یونیورسٹی اور 7 ہزار غیرملکی طلبہ پر اثر پڑے گا۔
