رحیم یارخان میں مبینہ پولیس مقابلے میں لاہور کے معروف امیر بالاج قتل کیس کا مرکزی ملزم خواجہ تعریف عرف طیفی بٹ مارا گیا۔ طیفی بٹ کو گزشتہ روز ہی دبئی سے گرفتار کرکے پاکستان منتقل کیا گیا تھا۔ذرائع کا کہنا ہے کہ خواجہ تعریف گلشن عرف طیفی بٹ کو دبئی سے پاکستان لانے کے بعد لاہور منتقل کیا جارہا تھا کہ رحیم یار خان کے قریب ملزم کے ساتھیوں نے حملہ کردیا۔ملزم طیفی بٹ نے دبئی کی عدالت میں بیان دیا تھا کہ وہ پاکستان جا کر اپنے خلاف دائر مقدمات کا سامنا کرنا چاہتے ہیں۔ذرائع نے بتایا کہ ملزم کی رضا مندی پر دبئی کی عدالت نے طیفی بٹ کو پنجاب پولیس کے حوالے کردیا گیا تھا۔ڈی ایس پی سی سی ڈی سید حسین حیدرملزم طیفی بٹ کولارہےتھے کہ طیفی بٹ کو چھڑانے کے لیے 7سے 8افراد نے سرکاری گاڑی پراندھا دھند فائرنگ کردی اور ملزم کو دوگاڑیوں پرمبینہ طورپرسی سی ڈی کی حراست سے فرار کیا گیا پولیس نے ملزم کو فرار کرنے والوں کا پیچھا کیا اور مبینہ مقابلے میں ماراگیا۔18 فروری 2024 کی رات لاہور کے علاقے چوہنگ میں ایک شادی کی تقریب میں فائرنگ ہوئی جس میں امیر بالاج ٹیپو سمیت تین افراد زخمی ہوئے۔ اسپتال پہنچنے پر بالاج ٹیپو جانبر نہ ہوسکے۔ پولیس کے مطابق یہ حملہ گوگی بٹ گروپ نےکیا تھا جبکہ منصوبہ بندی میں طیفی بٹ کا مرکزی کردار تھا۔جب کہ مقتول امیر بالاج ٹیپو کے محافظین کی فائرنگ سے حملہ آور بھی موقع پر مارا گیا تھا۔ حملے کے فوراً بعد پولیس نے متعدد مشتبہ افراد کو گرفتار کیا جبکہ امیر بالاج کا ایک قریبی دوست احسن شاہ بھی مخبری کے الزام میں زیرِ حراست آیا۔ وہ مبینہ طور پر پولیس مقابلے میں مارا گیا۔ تفتیش کے دوران پولیس نے گوگی بٹ اور طیفی بٹ کو قتل کی منصوبہ بندی اور مالی معاونت کے الزام میں نامزد کیاواضح رہے کہ امیر بالاج ٹیپو لاہور کے مشہور کاروباری و سیاسی خاندان ٹرکاں والا کے چشم و چراغ تھے۔ ان کے دادا بِلا ٹرکاں والا اور والد عارف عرف ٹیپو ٹرکاں والا گڈز ٹرانسپورٹ انڈسٹری کے بڑے ناموں میں شمار ہوتے تھے۔ تاہم ان کے خاندان اور لاہور کے بٹ گینگ جس میں گوگی بٹ اور طیفی بٹ شامل ہیں ان درمیان 1993 سے جاری دشمنی نے کئی جانیں لے لیں۔1994 میں بلا ٹرکاں والا کے قتل کے بعد ٹیپو ٹرکاں والا نے اپنے والد کے قاتلوں سے بدلہ لیا مگر یہ انتقامی سلسلہ ختم نہ ہو سکا۔ 2010 میں ٹیپو ٹرکاں والا کو لاہور ایئرپورٹ پارکنگ میں فائرنگ کرکے قتل کردیا گیا۔ اس قتل کے بعد دشمنی کا رخ ان کے بیٹے امیر بالاج ٹیپو کی طرف مڑ گیا۔
