نیشنل ڈیزاسٹر مینجمنٹ اتھارٹی نے جمعہ سے ملک کے بیشتر علاقوں میں مون سون کے نئے اسپیل سے متاثر ہونے کا خدشہ ظاہر کرتے ہوئے الرٹ جاری کر دیا ہے۔این ڈے ایم اے کا کہنا ہے کہ بارشوں کے آنے والے نئے اسپیل کے نتیجے میں ممکنہ شدید بارشوں کے باعث ملک کے معاشی حب کراچی میں بھی شہری سیلاب کا خدشہ ہے۔این ڈی ایم اے کے مطابق سندھ کے ساحلی اضلاع کراچی، ٹھٹھہ، سجاول، بدین، تھرپارکر میں 30 اگست تا 2 ستمبر کے دوران شدید بارشیں متوقع ہیں۔اندرونِ سندھ کے اضلاع بشمول حیدرآباد، دادو، سکھر، گھوٹکی، لاڑکانہ، جیکب آباد، کشمور میں 30 اگست تا 1 ستمبر موسلا دھار بارشوں کا امکان ہے۔اسی طرح این ڈی ایم اے کے مطابق 29 اگست تا 2 ستمبر اسلام آباد میں گرج چمک کے ساتھ مزید بارش متوقع ہے پنجاب کے شمالی و شمال مشرقی اضلاع میں 30 اور 31 اگست کے دوران شدید بارشوں کے سبب سیلابی صورتحال متوقع ہے۔وسطی و جنوبی پنجاب میں 29 تا 31 اگست کے دوران بارشیں متوقع ہیں جن کے پیشِ نظر نشیبی علاقے زیرآب آنے کا خدشہ ہے۔اسی طرح خیبر پختونخوا میں بھی 29 تا 31 اگست کے دوران شدید بارشوں کی پیش گوئی کی گئی ہے۔جبکہ آ زاد کشمیر میں مظفرآباد، باغ، حویلی، کوٹلی، میرپور، بھمبرمیں 29 اگست تا 2 ستمبر کے دوران شدید بارشوں کے ساتھ ساتھ لینڈ سلائیڈنگ کا خدشہ ہے۔این ڈی ایم کے مطابق بلوچستان کے ساحلی و مشرقی اضلاع بشمول گوادر، کیچ، پنجگور، خضدار، لسبیلہ، قلات میں 29 اگست تا 1 ستمبر تک بارشیں متوع ہیں جن کے پیشِ نظر نشیبی علاقوں سیلاب کا خدشہ ہے۔
