برطانوی وزیراعظم کیئر اسٹارمر نے انجیلا رینر کے استعفے کے بعد اپنی ساکھ بحال کرنے کے لیے بڑے پیمانے پر ردوبدل کرتے ہوئے نئے نائب وزیراعظم اور وزیر خارجہ مقرر کردیئے .برطانوی وزیر اعظم کے دفتر سے جاری ہونے والے اعلامیے کے مطابق ڈیوڈ لیمی کو برطانیہ کا وزیرانصاف اور نائب وزیراعظم مقرر کیا گیا ہے جبکہ ان کی جگہ یویٹی کوپر کو برطانیہ کی وزیر خارجہ مقرر کیا گیا ہے۔ جبکہ اعلامیے کے مطابق پاکستانی نژاد شبانہ محمود کو برطانیہ کی وزیر داخلہ مقررکیا گیا ہے۔ڈاؤننگ اسٹریٹ سے جاری اعلامیے کے مطابق اسٹیو ریڈ برطانیہ کے وزیر ہاؤسنگ جبکہ پیٹ میک فیڈن برطانیہ کے ورک اور پنشن کے وزیر مقرر کیے گئے ہیں۔پیٹر کائل کو برطانیہ کا وزیر تجارت، لِز کینڈل کو برطانوی وزیر سائنس جبکہ ایما رینولڈز کو برطانیہ کی وزیرماحولیات اور زراعت مقرر کیا گیا ہے۔ڈگلس الیگزینڈر اسکاٹ لینڈ کے وزیر مقرر کیے گئے ہیں جبکہ جوناتھن رینالڈز برطانیہ کے چیف وہپ مقرر کردیے گئے ہیں۔ڈیرن جونز کو برطانوی کابینہ آفس کا وزیر جبکہ ایلن کیمبل برطانوی ہاؤس آف کامنز کا لیڈر مقرر کیا گیا ہے۔گزشتہ ہفتے معاشی مشاورت کو مضبوط بنانے کے لیے ڈاؤننگ اسٹریٹ کی ٹیم میں تبدیلی کے بعد ایک وزارتی ردوبدل متوقع تھا، لیکن انجیلا رینر کے استعفے نے اس ردوبدل کو کہیں زیادہ وسیع کر دیا۔خیال رہے کہ سابق نائب برطانوی وزیراعظم اور ہاوسنگ منسٹر انجیلا رینر نے اپنے عہدے سے استعفیٰ دے دیا تھا۔
