خیبرپختونخوا کے ضلع بونیر میں سیلابی ریلوں سے تباہی کی میں ایک ہی خاندان کے 40 افراد جاں بحق ہوگئے۔ضلع بونیر میں خوفناک بارشوں اور سیلاب سے ہر طرف تباہی کے مناظر اور لاشیں بکھریں پڑی ہیں سیلابی ریلے میں کسی کا مکمل خاندان تو کسی کے خاندان کے درجنوں افراد بہہ گئے۔ضلع بونیر کے قادر نگر کے علاقے درہ میں سیلاب میں ایک ہی خاندان کے 40 افراد جاں بحق ہوئے اور ان کا پورا گھر بھی ملیا میٹ ہوگیا بڑی تعداد میں مویشی بھی ہلاک ہوئے۔قادر نگر میں سیلابی ریلے میں بہنے والوں میں شادی کی تیاری میں مصروف خاندان کی خوشیاں بھی سیلاب بہا لے گیا کئی کی لاشیں مل گئیں جبکہ بہت سے اب بھی لاپتہ ہیں۔ گاؤں درہ کے رہائشی 60 سالہ شاکراللہ نے بتایا کہ حالیہ سیلابی ریلے میں ان کے خاندان کے 40 افراد جاں بحق ہوئے ہیں۔ان کا کہنا تھا کہ 26 افراد تو ہم نے خود اپنے ہاتھوں سے دفن کیے اور باقی 16 افراد کی لاشیں تاحال نہیں ملی جو اب تک ملبے کے نیچے پڑی ہوئی ہیں۔خیال رہے کہ حالیہ بارشوں ، بادل پھٹنے کے واقعات اور سیلابی ریلوں کے باعث اب تک خیبر پختونخوا میں 328 افراد کے جاں بحق ہونے کی تصدیق ہو چکی ہے۔
