بھارت کی ڈائریکٹوریٹ آف ریونیو انٹیلیجینس نے معروف اداکارہ رانیا راؤ کو دبئی سے بنگلور واپسی پر 14.8 کلو سونا اسمگل کرنے کے الزام میں گرفتار کر لیا۔ بھارتی میڈیا کے مطابق ان کے قبضے سے تقریباً 14.8 کلوگرام سونا برآمد کیا گیا ہے۔ابتدائی تحقیقات کے مطابق اداکارہ نے سونے کے بارز کو اپنے لباس میں چھپانے اور کچھ حصہ پہن کر اسمگل کرنے کی کوشش کی۔حکام کا کہنا ہے کہ رانیا راؤ متحدہ عرب امارات سے بنگلور واپس پہنچیں، اور انہیں غیر معمولی طور پر بیرون ملک سفر کرنے کی وجہ سے زیر نگرانی رکھا گیا تھا۔بھارتی میڈیا کی رپورٹ کے مطابق اداکارہ کو پیر کے روز ایئرپورٹ پر گرفتار کیا گیا تھا اور بعد ازاں انہیں مقامی عدالت میں پیش کر کے 14 روزہ جوڈیشل ریمانڈ حاصل کر لیا گیا۔تحقیقات سے معلوم ہوا ہے کہ رانیہ راؤ دبئی سے بنگلورو کا سفر کر رہی تھیں اور پچھلے 15 دنوں میں 4 مرتبہ دبئی کا سفر کرنے کی وجہ سے ان پر خصوصی نگرانی رکھی گئی تھی۔بار بار بین الاقوامی سفر اور مشتبہ سرگرمیوں نے حکام کا شک بڑھا دیا جس کی بنا پر ٹارگٹڈ آپریشن کا آغاز کیا گیا۔بھارتی میڈیا کا کہنا ہے کہ جب اداکارہ ایئرپورٹ پہنچی تو انہوں نے مبینہ طور پر خود کو کرناٹکا پولیس کے ڈائریکٹر جنرل کی بیٹی ظاہر کیا اور پولیس سے درخواست کی کہ وہ انہیں گھر تک پہنچائیں۔ حکام اب یہ تحقیقات کر رہے ہیں کہ آیا ان کی سرگرمیوں میں کسی قانون نافذ کرنے والے افسران یا سرکاری حکام کا ہاتھ تو نہیں ہے .رانیا راؤ کو 2014 میں ریلیز ہونے والی کناڈا فلم مانیکیا میں کناڈا کے سپر اسٹار سودیپ کے مقابلے میں اہم کردار ادا کرنے کے بعد شہرت ملی۔ اس کے علاوہ، انہوں نے کئی ساؤتھ انڈین فلموں میں بھی اداکاری کے جوہر دکھائے ہیں۔
