ہریانہ سے تعلق رکھنے والی بھارتی یوٹیوبر جیوتی مہلوترا سمیت 6 افراد کو پاکستان کے لیے جاسوسی کے الزام میں گرفتار کرلیاگیا.ان لوگوں پر الزام ہے کہ انہوں نے پاکستانی خفیہ ایجنسی، ایجنٹوں اور مخبروں کو حساس معلومات دی ہیں ۔بھارتی میڈیا رپورٹ کے مطابق پولیس نے پاکستان کیلئے جاسوسی کے الزام میں جیوتی ملہوترا کو ریاست چندی گڑھ کے علاقے ہسار سے حراست میں لیا ہے۔یوٹیوب چینل دیسی۔انڈو۔جو کے نام سے سفری وی لاگز بنانے والے جیوتی ملہوترا کے یوٹیوب پر سبسکرائبر کی تعداد پونے 4 لاکھ سے زائد ہے۔جیوتی 2023ء میں پاکستان بھی آچکی ہیں۔بھارتی میڈیا کے مطابق ملہوترا نے اپنے یوٹیوب اور دیگر سوشل میڈیا پلیٹ فارمز پر Say No to War اور Sarv Dharm Vada Pav جیسے نعروں کے ذریعے ایک ایسا بیانیہ فروغ دیا جو پاکستان کے مفاد میں اور بھارتی ریاستی مؤقف کے خلاف تصور کیا جا رہا ہے۔بھارتی پولیس حکام نے الزام لگایا کہ خاتون وی لاگر نے پاکستانی ایجنٹوں سے واٹس ایپ، ٹیلی گرام اور اسنیپ چیٹ جیسے پلیٹ فارمز کے ذریعے معلومات شیئر کیں۔ان پر آفیشل سیکریٹس ایکٹ 1923“ کی دفعات 3، 4 اور 5، اور بھارتی قانونی ضابطہ کی دفعہ 152 کے تحت مقدمہ درج کیا گیا ہے۔ این ڈی ٹی وی کے مطابق سب انسپکٹر سنجے کی جانب سے ہِسار سِول لائنز پولیس اسٹیشن میں درج کی گئی ایف آئی آر کے مطابق، جیوتی ملہوترا کی ملاقات 2023 میں پاکستان ہائی کمیشن نئی دہلی کے ملازم سے ہوئی تھی۔ ملازم نے ملہوترا کو پاکستانی انٹیلی جنس آپریٹوز سے متعارف کرایا اور اس کے بعد دونوں کے درمیان انکرپٹڈ پلیٹ فارمز کے ذریعے باقاعدہ رابطہ ہوتا رہا۔
