بھارتی ڈپٹی چیف آف آرمی اسٹاف لیفٹیننٹ جنرل راہل سنگھ نے شکست کا اعتراف کرتے ہوئے دعویٰ کیا ہے کہ انڈیا اور پاکستان کے درمیان ہونے والی چار روزہ لڑائی کے دوران اسے ایک سرحد پر پاکستان کے علاوہ چین اور ترکی کا بھی سامنا تھا اور چین پاکستان کو انڈیا کی عسکری تنصیبات کے حوالے سے لائیو معلومات فراہم کر رہا تھا ساتھ ہی بھارتی ائیرڈیفنس کی ناکامی کا اعتراف کرتے ہوئے کہا ہمیں وقت پر اہم سامان نہیں ملا۔ڈیفنس انڈسٹری کی تقریب سے خطاب میں راہول سنگھ نے کہا کہ پاکستان کو ہماری نقل و حرکت اور اسٹریٹیجک تیاریوں کا پہلے سے علم تھا انہوں نے کہا کہ جب ڈی جی ایم او سطح کی بات چیت ہو رہی تھی تو پاکستان نے کہا کہ ہمیں معلوم ہے کہ آپ کا فلاں اہم شعبہ تیار ہے اور ایکشن کے لیے تیار کھڑا ہے۔ اسے چین سے براہ راست معلومات مل رہی تھیں۔جنرل راہول سنگھ نے بھارتی فوج کی ناکامیوں کو تسلیم کرتے ہوئے کہا کہ پاکستانی فوج کو ان کی تمام نقل و حرکت کا علم تھا اور پاکستان کی صلاحیتیں نے بھارتی فوج کو حیران کر دیا۔لیفٹیننٹ جنرل راہول سنگھ نے مزید کہا کہ بھارت کے بڑے سائز کی وجہ سے بھارتی ائرڈیفنس ناکام ہوگیا اور پاک فوج کے الفتح راکٹ سسٹم نے بھارتی فوجی اڈوں کو مؤثر طریقے سے نقصان پہنچایا۔انہوں نے چین پر الزامات عائد کیے کہ اس نے بھارتی سرزمین پر اپنے ہتھیاروں کا تجربہ کیا اور کہا کہ بھارت کو پاکستان، ترکی اور چین کے اتحاد نے مل کر شکست دی۔
