کراچی کے مختلف علاقوں میں سرکاری زمین پر گذشتہ کئی دہائیوں سے رہنے والے جوگیوں نے سندھ حکومت سے مطالبہ کیا ہے کہ انہیں سرکاری زمین الاٹ کر کے صدیوں سے خانہ بدوشی کی زندگی گزارنے والوں کو آباد کیا جائے۔ عبدالرحیم گوٹھ کی جوگی بستی کے رہائشی آئیڈان جوگی کے مطابق 1970 کی دہائی میں اُس وقت کے وزیراعظم ذوالفقار علی بھٹو نے عمرکوٹ میں جوگی دڑو کے مقام پر اس برادری کی مستقل آبادکاری کے لیے 20 ایکڑ سرکاری زمین مختص کی تھی تاکہ جوگی اپنی جھونپڑیوں کے بجائے پکے گھر بنا کر عزت کے ساتھ زندگی گزار سکیں۔ واضح رہے کہ کراچی کے علاقے سرجانی ٹاؤن میں واقع عبدالرحیم گوٹھ میں پکے مکانات کے درمیان موجود جوگی بستی میں تقریباً 50 خاندان آباد ہیں۔آئیڈان جوگی کے مطابق وقت گزرنے کے ساتھ آبادی میں اضافے کے بعد بڑی تعداد میں جوگی کراچی آ گئے، جو گذشتہ کئی دہائیوں سے یہاں رہتے ہیں۔ان کا کہنا تھا کہ ہم نے صدیوں سے خانہ بدوشی کی زندگی گزاری مگر اب زمانہ بدل گیا ہے۔ ہم سندھ حکومت اور پاکستان پیپلز پارٹی کے چیئرمین بلاول بھٹو سے اپیل کرتے ہیں کہ ہمیں زمین الاٹ کر کے جوگی کالونی بنا کر دیں، جہاں ہم عزت کی زندگی گزار سکیں۔دربدر گھومنے کی زندگی اب ختم ہونی چاہی تاکہ ہمارے بچے جھونپڑیوں کے بجائےاسکولوں میں جائیں اور ایک بہتر مستقبل پا سکیں۔ایک غیر کاری ادرے کی رپورٹ کے مطابق کراچی کے مختلف علاقوں میں جوگیوں کی 10 سے 15 آبادیاں موجود ہیں جن میں تقریباً 20 ہزار جوگی بستے ہیں۔جوگی بنیادی طور پر خانہ بدوش قبیلہ ہے۔ یہ جوگی سانپوں کے ساتھ ایک جگہ سے دوسری جگہ نقل مکانی کرنے بین پر سانپ کا رقص دکھانے اور ہاتھ دیکھ کر لوگوں کی قسمت کا احوال بتانے کے بدلے نقد رقم انعام کے طور پر لیتے ہیں۔ اس کے علاوہ جوگی گیدڑ سنگھی، زہر مُہرہ بھی فروخت کرتے ہیں۔ جوگیوں کے بقول اگر سانپ کاٹ لے تو منکے سے زہر کا علاج کیا جاتا ہے۔
