آزاد کشمیر کے ضلع جہلم ویلی کی لائن آف کنٹرول سے متصل علاقے پانڈو میں انسانی آبادی پر حملہ کرنے والے خونخوار تیندوے کو ہلاک کردیا گیا۔واضح رہے کہ 2 روز قبل تیندوا 8 سالہ بچی کو گھر کے صحن سے اٹھا کر لے گیا تھاجس کی لاش بعد ازاں کھیتوں سے برآمد ہوئی تھی۔جبکہ گزشتہ روز بھی اسی علاقے میں تیندوے کے حملے سے 17 سالہ نوجوان مدثر علی زخمی ہوگیا تھا۔یہ واقعہ ایل او سی کے قریبی علاقے پانڈو سیکٹر میں پیش آیا جہاں پاک فوج کی تعینات ٹیم نے تیندوے کی موجودگی کی اطلاع پر کارروائی کرتے ہوئے گولی چلا کر اسے ہلاک کیا۔مقامی افراد نے پاک فوج کی بروقت اور موثر کارروائی پر شکریہ ادا کیا اور سیکیورٹی اہلکاروں کو خراج تحسین پیش کیا۔
