حکومت پنجاب نے صوبہ بھر میں 8 فروری کو دفعہ 144 نافذ کردی۔دفعہ 144 کے نفاذ کا فیصلہ کابینہ کمیٹی برائے امن و امان اور صوبائی انٹیلی جنس کمیٹی کی سفارش پر کیا گیا۔ترجمان محکمہ داخلہ پنجاب کا کہنا ہے کہ 8 فروری کو ہر قسم کے سیاسی احتجاج، جلسے، جلوس، ریلیوں اور دھرنوں پر پابندی عائد کی گئی ہے۔محکمہ داخلہ پنجاب کی جانب سے جاری کردہ نوٹیفکیشن کے مطابق 144 امن و امان کے قیام ، انسانی جانوں اور املاک کے تحفظ کیلئے نافذ کی گئی ہے اور عوامی جلوس اور دھرنا دہشت گردوں کیلئے سافٹ ٹارگٹ ہو سکتا ہے۔نوٹیفکیشن کے مطابق شرپسند عناصر عوامی احتجاج کا فائدہ اٹھا کر ریاست مخالف سرگرمیاں کرسکتے ہیں۔واضح رہے کہ پاکستان تحریک انصاف نے 8 فروری کو یوم سیاہ کی کال دے رکھی ہے۔پاکستان تحریک انصاف پنجاب کی چیف آرگنائزر عالیہ حمزہ نے اراکین قومی و صوبائی اسمبلی کوہدایت جاری کردیں۔انہوں نے کہا کہ تمام رہنما اپنے حلقوں میں انتخابی دھاندلی کے خلاف پر امن احتجاج کریں. پی ٹی آئی ایک ذمہ دار سیاسی جماعت ہے احتجاج ہمارا آئینی و قانونی حق ہے۔
