جرمنی کا ایک مسافر طیارہ 10 منٹ تک بغیر پائلٹ اُڑتا رہا اس کا ایک پائلٹ بیت الخلاء چلا گیا تھا جبکہ دوسرا پائلٹ اس دوران بے ہوش ہوگیا۔غیر ملکی میڈیا رپورٹس کے مطابق جرمنی کے شہر فرینکفرٹ سے اسپین جانے والی لفتھانسا ایئر لائن کی ایک پرواز 10منٹ تک بغیر پائلٹ کے ہوا میں اڑتی رہی رپورٹ کے مطابق طیارے میں 199 مسافر اور عملے کے چھ ارکان سوار تھے، جو تقریباً 10 منٹ تک بغیر کسی پائلٹ کے ہوا میں پرواز کرتا رہا۔ جہاز کے 43 سالہ کپتان بیت الخلا گئے ہوئے تھے کہ اسی دوران ایئربس اے 321 کے 38 سالہ کو پائلٹ بے ہوش ہو گئے۔کپتان نے باتھ روم سے واپس آ کر کاک پٹ کا دروازہ کھولنے کے لیے عمومی کوڈ کا استعمال کیا جو کاک پٹ میں ایک الارم بجاتا ہے تاہم پانچ کوششوں کے باوجود دروازہ نہ کھل سکا۔ بعدازاں ایک کیبن کریو ممبر نے انٹرکام کے ذریعے بھی رابطے کی کوشش کی مگر ناکام رہا۔ آخر کار کپتان نے ہنگامی کوڈ کے ذریعے کاک پٹ کا دروازہ کھولا اور فوری طور پر طیارے کا کنٹرول سنبھال لیا۔رپورٹ کے مطابق فعال آٹو پائلٹ کی بدولت طیارہ مستحکم انداز میں پرواز جاری رکھنے میں کامیاب رہا۔رپورٹ میں کہا گیا کہ کو پائلٹ نے بے ہوشی کی حالت میں غیر ارادی طور پر طیارے کے کنٹرولز پر کچھ حرکت کی۔ دورانِ واقعہ ایئر ٹریفک کنٹرولر نے تین مرتبہ کو پائلٹ سے رابطے کی کوشش کی لیکن کوئی جواب موصول نہیں ہوا۔
