پاکستان انٹرنیشنل ائیرلائنز نے ٹورنٹو کینیڈا کیلئے اپنی تمام پروازیں 13 سے 27 ستمبر تک معطل کر دیں۔یہ اقدام بحراوقیانوس کوپارکرنےوالےخصوصی بوئنگ777لانگ رینج طیاروں کی ضروری میٹیننس کیلئے اٹھایاگیا۔پی آئی اےکے مطابق ٹورنٹو کیلئے 13سے 27 ستمبر تک آپریٹ ہونے والی تمام دو طرفہ 13 پروازیں منسوخ کر دی گئی ہیں۔پی آئی اے ٹورنٹو کیلئے اپنا فلائٹ آپریشن دو بوئنگ 777 ایل آر طیاروں کے ذریعے آپریٹ کرتی ہے اس وقت ایک طیارہ لینڈنگ گیئر میں خرابی کی وجہ سے گراؤنڈ ہے جبکہ دوسرا طیارہ مینٹیننس کے دوران غیر معیاری جیکس کا استعمال بوئنگ کمپنی کو رپورٹ ہونے کی وجہ سے گراؤنڈ کردیا گیا۔اس وقت پی آئی اے کے 12 بوئنگ 777 طیاروں میں سے صرف تین طیارے اور 12 ایئربس اے 320 طیاروں میں سے صرف 8 طیارے قابل پرواز ہیں۔ طیاروں کی کمی کی وجہ سے پی آئی اے کا بین الاقوانی اور اندرون ملک پروازوں کا نظام درہم برہم ہو کر رہ گیا ہے۔دوسری جانب پی آئی اے کے ایئرکرافٹ انجینئرز دس سال سے اپنی تنخواہوں میں اضافہ نہ ہونے کے خلاف تین ہفتوں سے مسلسل احتجاج پر ہیں اور بازوں پر سیاہ پٹیاں باندھ کر ڈیوٹی انجام دے رہے ہیں۔ ایئرکرافٹ انجینئرز نے غیر اعلانیہ گو بائی بک تحریک بھی شروع کر دی ہے اور طیاروں کی مینٹیننس کتاب میں درج ہدایات سے ہٹ کر نہیں کر رہے ہیں ایئر لائن کو فاضل پرزہ جات کی بھی شدید کمی ہے ان وجوہات کی وجہ سے پروازوں کیلئے طیارے دستیاب نہیں ہیں۔ ذرائع کا کہنا ہے کہ اس بات کا شدید امکان ہے کی پی آئی اے کی ٹورنٹو کیلئے پروازیں 27 ستمبر کے بعد بھی معطل رہیں گی
