اسپین میں مایورکا ائیر پورٹ پر نجی ائیر لائن کی پرواز میں اس وقت افرا تفری مچ گئی جب مانچسٹر جانے والی رائنا ایئر کی پرواز میں آگ کا الارم بجنے سے خوف و ہراس پھیل گیا۔ یہ واقعہ اس وقت پیش آیا جب طیارہ ٹیک آف کے لیے تیار تھا۔فائر الارم بجنے کے بعد خوف کے باعث مسافروں نے جہاز سے چھلانگ لگا دی ذرائع کے مطابق کم از کم 18 مسافر اس وقت زخمی ہو گئے جب وہ خوف کے مارے طیارے کے وِنگ سے نیچے چھلانگ لگا بیٹھے۔ ان میں سے 6 افراد کو فوری طور پر اسپتال منتقل کیا گیا جبکہ باقی زخمیوں کو موقع پر طبی امداد دی گئی۔عینی شاہدین نے بتایا کہ اس واقعے کے دوران صورتحال انتہائی کشیدہ تھی۔ کچھ مسافروں نے گھبراہٹ میں ایمرجنسی دروازے کھولے طیارے کے ونگ پر چڑھے اور نیچے جمپ کر گئے۔ کچھ افراد نے ایمرجنسی سلائیڈز کا استعمال کیا جبکہ کئی نے خطرناک انداز میں براہِ راست زمین پر چھلانگ لگا دی۔ایئرپورٹ کی ایمرجنسی سروسز کو فوراً الرٹ کیا گیا۔ چار ایمبولینسز، جن میں دو بیسک لائف سپورٹ اور دو ایڈوانس یونٹس شامل تھیں جائے وقوعہ پر پہنچیں۔ ایئرپورٹ کے فائر فائٹرز اور سول گارڈ بھی امدادی کارروائیوں میں شامل ہو گئے۔بعد میں ایئرلائن نے تصدیق کی کہ آگ کا الرٹ دراصل غلطی سے چلا تھا اور طیارے میں کوئی آگ نہیں لگی تھی۔ ترجمان کے مطابق مسافروں کو ایمرجنسی سلائیڈز کے ذریعے طیارے سے اتارا گیا اور واپس ٹرمینل پہنچایا گیا۔ پرواز کو ٹیک آف سے قبل ہی روک دیا گیا تھا۔
