امریکہ کے شہر لاس اینجلس کے جنگلات میں لگنے والی آگ بے قابو ہوگئی جبکہ آگ نے ہالی ووڈ ہلز کو بھی اپنی لپیٹ میں لے لیا ہے۔کئی سلیبریٹیز گھر چھوڑنے پر مجبور ہوگئے فلمی سرگرمیاں بھی متاثر ہوئی ہیں۔ امریکی میڈیا کے مطابق فائر فائٹرز پہلے ہی تین مختلف مقامات پر آگ بجھانے میں مصروف ہیں اور اب تک آگ سے پانچ افراد ہلاک ہو چکے ہیں جب کہ متاثرہ علاقوں کے مکینوں کو فوری علاقہ خالی کرنے کے احکامات جاری کیے گئے ہیں۔آتشزدگی کی وجہ سے میٹروپولیٹن ایریا میں کوسٹ آئی لینڈ سے پسادینا تک رہائش پذیر ایک لاکھ تیس ہزار سے زیادہ آبادی کو علاقہ خالی کرنے کے احکامات جاری کیے گئے ہیں۔امریکی اداکار و پروڈیوسر جیمی لی کرٹس، گلوکارہ مینڈی مور اور کئی سلیبریٹیز سمیت ہزاروں افراد آگ سے متاثرہ علاقے سے نقل مکانی کر چکے ہیں۔ریاست کیلیفورنیا کے شہر لاس اینجلس میں منگل کی صبح لگنے والی آگ کے باعث اب تک ایک ہزار سے زائد مکانات اورعمارتیں جل کرخاکستر ہوچکی ہیں تیز ہواؤں کی وجہ سے آگ مزید پھیل رہی ہے۔
