ناروے کپ کے دوران پاکستان کی مسلم ہینڈ کی ٹیم کا ایک فٹبالر امان اللہ رؤف بلوچ اوسلو میں غائب ہوگیا۔ ناروے کپ اسٹریٹ فٹبال چیمپئن شپ میں شریک پاکستانی فٹبالر امان اللہ رؤف بلوچ پاکستانی ٹیم کے ہمراہ اوسلو پہنچا اسٹریٹ فٹبالر چیمپئن شپ میں شرکت سے قبل ہی ٹیم سے علیحدہ ہوگیا اور ٹیم مینجمنٹ اور کھلاڑیوں سے رابطہ بھی منقطع کر لیا۔فٹبالر امان اللہ رؤف بلوچ کا تعلق کراچی کے علاقے لیاری سے ہے ترجمان مسلم ہینڈز کا بتانا ہے کہ فٹبالر امان اللہ ایونٹ کی استقبالیہ تقریب میں بھی نہیں آئے حتیٰ کہ اب مسلم ہینڈز کی ٹیم وطن واپس آچکی ہے۔ترجمان کے مطابق امان اللہ کا پاسپورٹ ناروے میں پاکستانی سفارتخانہ میں جمع کرادیا ہے اور ناروے پولیس سمیت پاکستانی سفارتخانہ کو تمام صورتحال سے آگاہ کیا جاچکا ہے۔قبل ازیں گزشتہ ماہ جرمنی میں ہونے والی ورلڈ یونیورسٹی گیمز میں پنجاب یونیورسٹی کے 2 طالب علم شازل احمد اور ندیم علی کھیلوں کے ایونٹ کے دوران غائب ہو گئے تھے۔واضح رہے کہ ناروے کپ میں انڈر 15 ایونٹ میں شریک بیٹر فیوچر پاکستان کی ٹیم لیاری کے کھلاڑیوں پر مشتمل تھی بیٹر فیوچر کی ٹیم پورے ٹورنامنٹ میں ناقابل شکست رہی اور ہر میچ میں حریف کو آؤٹ کلاس کرتے ہوئے ٹرافی اپنے نام کی تھی۔
