امریکی صدر ڈونلڈ ٹرمپ نے کینیڈا کو پیشکش کی ہے کہ اگر وہ امریکا کا حصہ بن جائے تو وہ ان کا جدید میزائل دفاعی سسٹم گولڈن ڈوم مفت حاصل کر سکتا ہے۔ٹرمپ نے کہا کہ البتہ اگر کینیڈا خودمختار ریاست کے طور پر برقرار رہا تو اسے دفاعی سسٹم کا حصہ بننے کے لیے 61 ارب ڈالر ادا کرنا ہوں گے۔ امریکی صدر ٹرمپ جو بار ہا کینیڈا کو امریکا کی 51ویں ریاست بنانے کی خواہش ظاہر کر چکے ہیں انہوں نے منگل کو اپنے سوشل میڈیا پلیٹ فارم ٹروتھ سوشل پر کہا کہ کینیڈا اگر امریکا کا حصہ بن جائے تو اسے گولڈن ڈوم دفاعی سسٹم مفت ملے گا۔کینیڈا کےوزیر اعظم مارک کارنی نےگزشتہ ہفتے کہا تھا کہ ان کا ملک 175 ارب ڈالر کے مجوزہ منصوبے میں سرمایہ کاری پر غور کر رہا ہے۔البتہ کینیڈا امریکا میں ضم ہونے پر بالکل تیار نہیں ہے۔گزشتہ دنوں امریکی صدر ڈونلڈ ٹرمپ نے غیر ملکی حملوں سے امریکا کو بچانے کے لیے ایک نئے میزائل دفاعی نظام گولڈن ڈوم کے منصوبے کا اعلان کیا تھا اور بتایا تھا کہ یہ نظام ان کی دوسری مدت صدارت کے اختتام تک فعال ہو جائے گا۔ٹرمپ نے کہا تھا کہ گولڈن ڈوم دفاعی نظام پر175ارب ڈالرخرچ ہوں گے۔
