صوبائی ڈیزاسٹر مینجمنٹ اتھارٹی نے پنجاب میں مون سون بارشوں کے چوتھے اسپیل کا الرٹ جاری کر دیا جبکہ محکمہ موسمیات نے ملک بھر میں مزید بارشوں کی پیشگوئی کردی۔ محکمہ موسمیات کے مطابق مغربی ہواؤں کی آمد سے چاروں صوبوں میں مون سون کی مزید بارش کا امکان ہے۔پنجاب سے متعلق پی ڈی ایم اے کے مطابق 20 سے 25 جولائی کے دوران صوبے کے بیشتر اضلاع میں تیز آندھی، گرد آلود ہواؤں اور بارش کا امکان ہے۔لاہور، فیصل آباد، سیالکوٹ، نارووال، ٹوبہ ٹیک سنگھ جھنگ سرگودھا اور میانوالی میں بارشوں کے امکانات ہیں پی ڈی ایم اے کے مطابق 18 جولائی سے 23 جولائی تک ملتان، ڈیرہ غازی خان، بہاول پور اور بہاول نگر میں بھی بارش کا امکان ہے جبکہ راولپنڈی، مری، گلیات، اٹک، چکوال، منڈی بہاالدین، حافظ آباد، گجرات، جہلم، گوجرانوالہ میں تیز ہواؤں کے ساتھ بارش متوقع ہے۔ڈائریکٹر جنرل پی ڈی ایم اے عرفان علی کاٹھیا نے شہریوں سے التماس کی کہ خراب موسم میں احتیاطی تدابیر اختیار کریں آندھی و طوفان کی صورتحال میں محفوظ مقامات پر رہیں غیر ضروری سفر سے گریز کریں۔محکمہ موسمیات کے مطابق جمعہ کی رات سے 20 جولائی تک سندھ کے علاقوں میں تیز ہواؤں کے ساتھ موسلادھار بارش کی پیشگوئی کی گئی ہے تھرپارکر، مٹھی،عمر کوٹ، میرپور خاص، ٹھٹھہ،بدین، حیدرآباد، ٹنڈو اللہ یار، ٹنڈو محمد خان، کراچی، شہید بینظیر آباد، خیرپور، دادو، جیکب آباد، کشمور، سانگھڑ، سکھر، گھوٹکی اور لاڑکانہ میں بارش کا امکان ہے۔خیبرپختونخوا میں 20 سے 25 جولائی کے دوران تیز ہواؤں کے ساتھ شدید بارش کی پیشگوئی کی گئی ہے، دیر، سوات، چترال، مالاکنڈ، کوہستان، شانگلہ بٹگرام، بونیر، کوہاٹ، کرک، بنوں، ٹانک، لکی مروت، ڈیرہ اسماعیل خان، باجوڑ، مہمند، خیبر، وزیرستان، اورکزئی، مانسہرہ، ایبٹ آباد، ہری پور، پشاور، چارسدہ، نوشہرہ، مردان، صوابی، ہنگو اور کرم میں بارشوں کی توقع ہے۔کشمیر میں 20 جولائی سے 25 جولائی تک بارشوں کا امکان ظاہر کیا گیا ہے اس دوران بعض مقامات پر موسلادھار بارش ہونے کی بھی توقع ہے نیلم ویلی، مظفر آباد، راولا کوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور خاص میں بارشیں ہونے کا امکان ہے۔گلگت بلتستان کے علاقوں دیامر، استور، اسکردو، ہنزہ، گلگت، گھانچے اور شگھر میں 21 جولائی سے 26 جولائی تک وقفے وقفے سے بارش ہونے کا امکان ہے۔18 جولائی سے 25 جولائی تک بلوچستان کے علاقوں لسبیلہ، آواران، خضدار، کوئٹہ، قلعہ سیف اللہ، قلعہ عبداللہ، لورالائی اور بارکھان میں بارش کا امکان ہے۔
