جمعرات کو ہوا کا کم دباؤ مزید شدت اختیار کرنے کے بعد ڈپریشن میں تبدیل ہوسکتا ہے شہر میں منگل کو بارش کا سبب بننے والا سسٹم کمزور ہوگیا مگر ختم نہیں ہواجمعہ کو کراچی میں دوبارہ بارش کے اسپیل ہوسکتے ہیں۔ترجمان محکمہ موسمیات انجم نذیرضیغم کا کہنا ہے کہ کراچی میں منگل کو تندوتیز ہواؤں اور گرج چمک کےساتھ بارش کا سبب بننے والا سسٹم کمزور پڑ گیا تاہم مذکورہ سلسلہ ابھی مکمل طورپر ختم نہیں ہوا اسی وجہ سے اب بھی یہ امکان موجود ہے کہ جمعہ کو کراچی میں دوبارہ بارش ہوجائے۔محکمہ موسمیات نے بدھ کو تیسرا ٹروپیکل سائیکلون الرٹ جاری کیا جس کے مطابق بھارتی گجرات کے اوپر کئی روز سے موجود ہوا کا کم دباؤ کا علاقہ مغرب کی طرف بڑھنے کے بعد اب شمال مشرقی بحیرہ عرب اور ملحقہ انڈین علاقے سوراشٹرا کے قریب موجود ہے، ہوا کا کم دباؤ کراچی سے تقریبا 310کلومیٹر جنوب مشرق میں ہے۔محکمہ موسمیات وارننگ سینٹر کراچی مذکورہ سسٹم کی مسلسل نگرانی کررہا ہے بدھ کو شہر میں ہلکی بارش کی پیش گوئی کی گئی تھی تاہم شہر کا مطلع صاف اور جذوی ابرآلود رہا زیادہ سے زیادہ درجہ حرارت 33.5ڈگری جبکہ ہوا میں نمی کا تناسب 56فیصد رہا۔یہ سمندری نظام مغرب کی جانب بڑھےگا اور اگلے مرحلے میں ڈپریشن کی شکل میں مزید شدت اختیار کرےگا سمندر میں اس سرگرمی کے نتیجے میں 55کلومیٹر فی گھنٹہ کی رفتار سے ہوائیں چلنے کے سبب ناہموار صورت پیدا ہوسکتی ہے. سندھ کے ماہی گیر 3 اکتوبر تک گہرے سمندر میں جانے سےگریز کریں۔
