کراچی میں جمعرات کی دوپہر دو دریا کے قریب سی ویو پر اپنے دو کم عمر بچوں سمیت سمندر میں کود کر خودکشی کرنے والے شخص کی لاش مل گئی .ایدھی کے ترجمان نے کہا کہ ہفتے کی صبح جب ان کے لائف گارڈز نے سرچ آپریشن دوبارہ شروع کیا تو انہیں چائنا پورٹ کے قریب سمندر میں اورنگزیب عالم کی لاش تیرتی ہوئی ملی۔ جبکہ متوفی کے دو کم عمر بچوں احمد اور آیت کی لاشیں جمعے کی صبح سی ویو پر ملی تھیں.پولیس کے مطابق بچوں کے ماموں رمیز حسین نے تحریری بیان میں پولیس کو بتایا کہ ان کے بہنوئی عالم اور بہن اپنے بچوں سمیت 31 جولائی کو بچوں کی حوالگی سے متعلق پٹیشن پر عدالت میں پیش ہوئے تھے۔ انہوں نے بتایا کہ بچوں کی حوالگی کا معاملہ میاں بیوی کے درمیان خوش اسلوبی سے طے پا گیا تھا بعد میں عالم، اپنی بیوی اور بچوں کے ساتھ برنس روڈ کی فوڈ اسٹریٹ میں دوپہر کا کھانا کھانے گئے کھانے کے دوران وہ یہ کہہ کر ریستوران سے باہر نکلے کہ انہیں بیت الخلا جانا ہے، اور اپنے بچوں کو بھی ساتھ لے گئے، لیکن واپس نہ آئے۔
