عالمی شہرت یافتہ اسلامی اسکالر اور مبلغ ڈاکٹر ذاکر نائیک 430 فٹ کی بلندی سے کود گئے ویڈیو وائرل ہوگئی انہوں نے 59 برس کی عمر میں ایک نیا ایڈونچر کرکے اپنے مداحوں کو حیران کردیا۔ڈاکٹر ذاکر نائیک نے انڈونیشیا کے سیاحتی جزیرے بالی میں 430 فٹ بلند مقام سے بنجی جمپنگ کا شاندار مظاہرہ کیا۔ یہ ایڈونچر ناصرف ان کے جرأت مندانہ طرز عمل کو ظاہر کرتا ہے بلکہ ان کی زندگی میں نئے تجربات میں دلچسپی کا بھی مظہر ہے۔ڈاکٹر ذاکر نائیک صرف بنجی جمپنگ تک محدود نہیں رہے بلکہ انہوں نے کلف جمپنگ اور واٹر سلائیڈنگ جیسے سنسنی خیز ایڈونچرز میں بھی حصہ لیا اور بھرپور انداز میں لطف اندوز ہوئے۔ڈاکٹر ذاکر نائیک نے اپنے اس دلیرانہ تجربے کو اپنے سوشل میڈیا اکاؤنٹس پر شیئر کرتے ہوئے کہا کہ زندگی کے مختلف تجربات انسان کو نئی توانائی دیتے ہیں اور انسان کو ہمیشہ نئے چیلنجز کا سامنا کرنا چاہیے۔ بنجی جمپنگ ایک ایڈونچر کھیل ہے جس میں انسان ایک لچکدار رسی کے ساتھ بندھ کر بلند مقام سے نیچے چھلانگ لگاتا ہے۔ یہ کھیل عام طور پر کسی پل، عمارت یا پہاڑ کی چوٹی سے کیا جاتا ہے جہاں رسی نیچے گرتے ہوئے شخص کی رفتار کو روک کر اسے دوبارہ اوپر اچھال دیتی ہے جس سے ایک جھولے جیسا تاثر پیدا ہوتا ہے۔ یاد رہے کہ ڈاکٹر ذاکر نائیک نے پچھلے سال یوگنڈا کے دورے پر 165 فٹ کی بلندی سے بنجی جمپنگ کی تھی جس کے بعد ان کی یہ نئی چیلنجز کا سامنا کرنے کی خواہش مزید بڑھ گئی۔
