راولپنڈی میں پولیس نے اہم کارروائی کرتے ہوئے انسانی جسم کے اعضا کی خریدو فروخت میں ملوث گروہ کے کارندے کو گرفتار کرلیا چھاپے کے دوران اسٹریچر سے بندھے ہوئے نوجوان حنان زاہد کو بھی بازیاب کروالیا گیا تاہم 6 ملزمان فرار ہونے میں کامیاب ہوگئے۔یاد رہے کہ 2 اگست کو راولپنڈی پولیس نے نوکری کا جھانسہ دے کر انسانی اعضا کی غیر قانونی پیوند کاری میں ملوث 4 رکنی گینگ کوگرفتار کرکے پیوند کاری میں استعمال ہونے والے آلات برآمد کیے تھے۔پولیس حکام کی جانب سے بتایا گیا ہے کہ راولپنڈی میں گردوں کی غیر قانونی پیوندکاری کے خلاف آپریشن کا سلسلہ جاری ہے اس دوران پولیس کو اہم کامیابی ملی ہے۔راولپنڈی پولیس نے چھاپہ مار کارروائی کی تو ایک شہری اسٹریچر سے بندھی ہوئی حالت میں ملا جس کی شناخت حنان زاہد کے نام سے ہوئی.
