تربت پولیس نے بلوچ یکجہتی کمیٹی کی مرکزی آرگنائزر ڈاکٹر ماہ رنگ بلوچ، مکران ہائی کورٹ بار ایسوسی ایشن کے صدر محراب خان گچکی اور کئی سینئر وکلا کے خلاف اشتعال انگیز تقاریر کرنے پر ایف آئی آر درج کرلی۔ایف آئی آر کے مطابق لاپتا افراد کے معاملے پر ایک سیمینار کے انعقاد سے قبل انہوں نے حکومت کے خلاف اشتعال انگیز تقاریر کیں اور ایسے اجتماعات سے روکنے والی دفعہ 144 کے نفاذ کے باوجود زبردستی دکانیں اور بازار بند کروائے۔انہوں نے نعرے لگائے اور بعد میں خود کو تھانے میں گرفتاری کے لیے پیش کرنے کی کوشش کی۔پولیس کے حوالے سے کہا گیا کہ ماہ رنگ بلوچ، صبغت اللہ شاہ جی، ایڈووکیٹ مجید دشتی، نجمہ مولا بخش، احسان برکت، ایڈووکیٹ مجید شاہ، بی بی نسیمہ، مہرین بلوچ، ایڈووکیٹ محراب، حمید بلوچ، محمد یونس اور بڑی تعداد میں بلوچ یکجہتی کمیٹی کے کارکنان مرکزی تربت چوک پر جمع تھے۔ وکلا نے اپنے ساتھیوں کے خلاف درج ایف آئی آر کو بلاجواز قرار دیتے ہوئے بدھ کو عدالتی کارروائی کے بائیکاٹ کا اعلان کیا۔ ان کا کہنا تھا کہ بائیکاٹ جمعہ تک جاری رہے گا۔
