سوئٹزرلینڈ کے شہر زیورخ میں فٹ بال تنظیم فیڈریشن انٹرنیشنل فٹ بال ایسوسی ایشن (فیفا) کے صدرکی میزبانی میں منعقد ہونے والے اجلاس میں سعودی عرب کو 2034 کے فٹبال ورلڈکپ کی میزبانی کے فرائض سونپ دیئے گئے۔جبکہ یہ بھی اعلان کیا گیا کہ ورلڈ کپ 2030 کی میزبانی سپین، پرتگال اور مراکش مشترکہ طور پر کریں گے. فیفا کے اعلان کے مطابق 2030 کے ورلڈ کپ کی 6 ممالک میزبانی کریں گے جس میں اسپین، پرتگال اور مراکش شامل ہوں گے، ایونٹ مشترکہ طور پر 6 ممالک میں کھیلا جائے گا، ارجنٹائن، پیراگوئے اور یوروگوئے کو 104 میچز میں سے ایک ایک میچ دیا جائے گا۔فیفا کے صدر جیانی انفینٹینونے کہا دنیا تنازعات اور جنگوں سے گزر رہی ہے لیکن صرف فٹبال ہی لوگوں کو اکٹھا کرسکتی ہے۔انہوں نے اس یقین کا اظہار کیا کہ ورلڈ کپ 2034 شاندار ہو گا اور تمام فیڈریشنز کے اتفاق رائے پرخوشی ہے۔ فٹبال ورلڈ کپ سپورٹس کا سب سے بڑا ایونٹ اور تمام لوگوں کے لیے بڑے جشن کا موقع ہے۔ریاض میں درعیہ اور بلیو ارڈ سٹی میں ورلڈ کپ کی میزبانی کا اعلان سننے کےلیے بڑی سکرینیں نصب تھیں جہاں ہزاروں افراد اس تاریخی لمحے کے منتظر رہے۔ورلڈ کپ کی میزبانی کے لیے سعودی عرب کی بولی کورکن فیڈریشنز سے مکمل اتفاق رائے حاصل ہوا ہے۔ورلڈ کپ 2034 میں 48 ٹیمیں شرکت کریں گی اور سعودی عرب کے پانچ شہروں ریاض، جدہ، الخبر، نیوم اور ابہا میں میچ منعقد کیے جائینگے۔
