مقبول اداکار منیب بٹ نے کہا ہے کہ آج کل کے دور میں شادیوں کے ٹوٹنے کی متعدد وجوہات ہیں اور پریشان کن بات یہ ہے کہ طلاق کی شرح کم ہونے کے بجائے بڑھتی جا رہی ہے۔انہوں نے موبائل فونز اور سوشل میڈیا کے استعمال کو انسان کی بے صبری سے جوڑتے ہوئے طلاق کا ایک سبب بھی قرار دیا۔اداکار منیب بٹ نے کہا ہے کہ مشترکہ خاندان میں نہ رہنا موبائل فون اور سوشل میڈیا کا زیادہ استعمال طلاق کے بڑے اسباب ہیں۔اداکار کے مطابق موبائل اور انٹرنیٹ کی وجہ سے تھوڑی سی بات ہونے پر ہر کوئی میسیج یا پوسٹ کر دیتا ہے جس سے باتیں تیزی سے پھیل جاتی ہیں ایسے رجحان سے انسان میں صبر ختم ہوتا جا رہا ہے ہر کوئی عدم برداشت سے دور ہو رہا ہے۔منیب بٹ نے مزید کہا کہ ماضی میں مشترکہ خاندان کی روایت ہوتی تھی اب ایسا نہیں ہوتا، ہمارے ہاں مغربی کلچر پروان چڑھ رہا ہے شادی ہوتے ہی لڑکا اور لڑکی الگ ہوجاتے ہیں.جب دو مختلف سوچ اور ذہنیت کے لوگ شادی کرکے الگ رہنے لگیں گے تو ان میں اختلافات ہوں گے اور پھر ان میں صلح یا ثالثی کروانے والا کوئی نہیں ہوگا۔ان کا کہنا تھا کہ مشترکہ خاندان میں بڑے اور بزرگ موجود ہوتے ہیں جو کسی بھی اختلاف یا کشیدگی کے دوران ثالث کا کردار ادا کرتے ہیں، وہ بچوں کو سمجھاتے ہیں، جس سے شادی ٹوٹنے تک نوبت نہیں جاتی۔اداکار کے مطابق جب بھی کسی مرد کی زندگی میں نکاح کے ذریعے خاتون آتی ہے تو اس کی زندگی میں برکت آجاتی ہے، چیزیں کب، کہاں سے بدلنا شروع ہوتی ہے، اس کا پتا ہی نہیں چلتا۔ منیب بٹ نے بیٹیوں کو رحمت‘ قرار دیتے ہوئے کہا ہے کہ بیٹیوں کی پیدائش کے بعد ان کا کیریئر بہتر ہوا جب کہ ان کے معاشی حالات بھی مزید بہتر ہوئے۔
