ایئر کینیڈا کے 10 ہزار ملازمین نے تنخواہوں پر مذاکرات ناکام ہونے کی صورت میں ہڑتال کردی جس کے نتیجے میں ملک کی سب سے بڑی فضائی کمپنی نے اپنی بیشتر پروازیں معطل کر دی ہیں۔غیر ملکی میڈیا کے مطابق ائیر کینیڈا اور کینیڈین یونین آف پبلک ایمپلائز کے درمیان تقریباً 8 ماہ سے معاہدے پر بات چیت چل رہی تھی جس کی ناکامی پر 10 ہزار کے قریب ملازمین نے ہڑتال کا اعلان کردیا جس سے روزانہ 1 لاکھ 30 ہزار مسافر متاثر ہوں گے جب کہ ایک دن میں تقریباً 25ہزار کینیڈین بیرون ملک میں پھنس سکتے ہیں۔ ہڑتال کے دوران عملہ کینیڈا کے بڑے ہوائی اڈوں پر احتجاجی مظاہرے بھی کرے گا۔ائیرلائن انتظامیہ کا کہنا ہےکہ انہوں نے ملازمین کو پیشکش کی ہے جس میں 4 سالوں کے دوران مراعات اور پنشن سمیت کل معاوضے میں 38 فیصد اضافہ شامل ہے۔تاہم یونین نے اس پیشکش سے پیچھے ہٹتے ہوئے کہا کہ پہلے سال میں مجوزہ 8 فیصد اضافہ مہنگائی کی وجہ سے کافی حد تک نہیں ہوا۔انتظامیہ کے مطابق وہ مسافروں کے دیگر کینیڈین ائیر لائنز یا پھر غیر ملکی ائیر لائنز کے ذریعے سفر کو ممکن بنانے کی کوشش کریں گے جبکہ ائیر کینیڈا کے مطابق متاثر ہونے والے مسافر ائیر لائن کی ویب سائٹ یا موبائل ایپ پر مکمل رقم کی واپسی کی درخواست کرنے کے اہل ہوں گے۔
