امریکی محکمہ خارجہ نے کالعدم بلوچستان لبریشن آرمی اور اس کے ذیلی گروپ مجید بریگیڈ کو غیر ملکی دہشت گرد تنظیم قرار دے دیا۔امریکی محکمہ خارجہ کی ویب سائٹ پر جاری ایک بیان کے مطابق بلوچ لبریشن آرمی جو پہلے ہی خصوصی طور پر نامزد عالمی دہشت گرد تنظیم کے طور پر درج تھی اس میں مجید بریگیڈ کو بھی اس کے عرف یا ذیلی گروپ کے طور پر شامل کیا جا رہا ہے۔پریس ریلیز میں کہا گیا ہے کہ بی ایل اے اور مجید بریگیڈ کو دہشتگردوں کی فہرست میں شامل کردیا گیا ہے۔امریکی وزیر خارجہ مارکو روبیو نے کہا ہے کہ محکمہ خارجہ بلوچستان لبریشن آرمی اور مجید بریگیڈ کہلانی والی تنظیم کو غیرملکی دہشتگرد قرار دے رہا ہے۔ یہ اقدام انسداد دہشتگردی سے متعلق ٹرمپ انتطامیہ کے عزم کا اظہار ہے۔اعلامیہ میں کہا گیا کہ 2019 میں کالعدم بی ایل اے کو خصوصی طور پر نامزد عالمی دہشت گرد قرار دیا گیا تھا جبکہ مجید بریگیڈ کا نام بی ایل اے کے عالمی دہشت گرد فہرست میں شامل ہے۔امریکی محکمہ خارجہ کی جانب سے کہا گیا کہ ٹرمپ انتظامیہ کا دہشتگردی کی روک تھام کے لیے عزم برقرار ہے۔مارکو روبیو کا کہنا تھا کہ بی ایل اے اور مجید بریگیڈ کے خلاف اقدام امیگریشن اور نیشنلیٹی ایکٹ کے تحت کیا گیا ہے اور اسکا اطلاق فیڈرل رجسٹر میں اشاعت کے ساتھ ہی ہوجائے گا۔ مارکو روبیو نے کہا کہ 2019 سے ابتک بی ایل اے نے کئی اضافی حملوں کی ذمہ داری بھی قبول کی ہے جن میں مجید بریگیڈ کی جانب سے قبول کی گئی ذمہ داری بھی شامل ہیں۔سن دوہزار چوبیس میں بی ایل اے نے کراچی ایئرپورٹ کے قریب خودکش حملے کی ذمہ داری قبول کی تھی۔ اسی طرح 2025 میں بی ایل نے جعفر ایکسپریس ٹرین میں لوگوں کو یرغمال بنانے کی ذمہ داری قبول کی تھی۔ کوئٹہ سے پشاور جانیوالی اس ٹرین پر حملے میں 31 شہریوں کو قتل اور تین سو سے زائد مسافروں کو یرغمال بنایا گیا تھا۔بی ایل اے بلوچستان سب سے بڑے مسلح گروہوں میں سے ایک ہے۔ پاکستان اور امریکہ دونوں نے اسے دہشت گرد تنظیم قرار دیا ہے۔
