جسٹس امین الدین خان کی سربراہی میں سپریم کورٹ کے پانچ رکنی آئینی بینچ نے بھاری گاڑیوں کی اوور لوڈنگ کے خلاف کیس کی سماعت کی۔بھاری گاڑیوں کی اوور لوڈنگ کے خلاف کیس کی سماعت کے دوران جسٹس جمال مندوخیل نے ریمارکس دیئے ہیں کہ حادثات سے مرنے والوں کی تعداد دہشت گردی یا بیماریوں سے مرنے والوں سے زیادہ ہے۔جسٹس حسن اظہر رضوی نے ریمارکس دیئے کہ پورٹ قاسم، کورنگی، انڈسٹریل ایریا کی سڑکوں میں دو دو فٹ کے کھڈے حادثات کا باعث بنتے ہیں۔دوران سماعت بیرسٹر ظفر اللہ نے موقف اپنایا کہ اصل مسئلہ گاڑیوں کی اوور لوڈنگ کے مقام کا ہے جب تک لوڈنگ کے مقامات کے خلاف ایکشن نہیں ہوگا کنٹرول نہیں ہوسکتا۔سرکاری وکیل نے موقف اختیار کیا کہ بہت سارے قوانین تبدیل کرکے جرمانے بڑھائے گئے ہیں۔ جسٹس امین الدین خان کی جانب سے ریمارکس دیئے گئے کہ اس کیس پر ہم تفصیلی حکم جاری کریں گے تب تک کیس زیر التوا رہے گا۔
