سعودی عرب میں مختلف علاقوں میں تیز ہوائیں، اولے اور موسلادھار بارش متوقع ہے۔ کئی علاقوں میں شدید بارشوں کے باعث سیلابی صورتحال پیدا ہونے کا خدشہ ہے۔ سعودی عرب نے الرٹ جاری کرتے ہوئے خبردار کیا ہے کہ یہ شدید موسمی صورتحال جمعرات 20 فروری تک برقرار رہے گی۔سعودی نیشنل سینٹر فار میٹرولوجی نے الرٹ جاری کرتے ہوئے خبردار کیا ہے کہ مقدس شہروں مکہ مکرمہ اور مدینہ منورہ میں بھی خراب موسم کی پیش گوئی کی گئی ہے جہاں تیز ہواؤں، اولوں اور سیلاب کے خطرات لاحق ہو سکتے ہیں۔سعودی محکمہ موسمیات نے آئندہ تین دنوں تک ملک کے مختلف حصوں میں بارش کی پیش گوئی کی ہے جن میں دارالحکومت ریاض، حائل، القصیم، مشرقی صوبہ، شمالی سرحدی علاقے، مکہ مکرمہ اور مدینہ منورہ شامل ہیں۔ دیگر متاثرہ علاقوں میں طائف، میسان، اضم، العرضیات، المویہ، الخرما، رنیہ، ترویہ، بحرة، الجموم، خلیص اور الکامل شامل ہیں۔ بعض علاقوں میں برفباری کا بھی امکان ہے جس سے درجہ حرارت میں اچانک کمی ہو سکتی ہے۔ حکام نے شہریوں کو احتیاطی تدابیر اختیار کرنے اور موسمی صورتحال سے باخبر رہنے کی ہدایت کی ہے۔
