پاکستان تحریک انصاف کے رہنما سلمان اکرم راجا نے سیکریٹری جنرل کے عہدے سے علیحدگی کا فیصلہ کرلیا۔سلمان اکرم راجہ کے مطابق آج ایک ایسا واقعہ ہوا جو اب مجھ سے دو ٹوک فیصلےکا تقاضہ کرتا ہے میری زندگی کھلی کتاب ہے میرا کوئی عمل کسی اصول سے متصادم نہیں، میرا مختصر خاندان میرے ساتھ کھڑا ہے۔اپنے ایک بیان میں انہوں نے کہا کہ منگل کے روز بانی پی ٹی آئی سے عہدے سے علیحدگی کی گزارش کروں گا پارٹی کے لئے وکالتی خدمات بلامعاوضہ جاری رکھوں گا۔سلمان اکرم راجا کا کہنا تھا کہ پچھلے منگل میں نے علی بخاری ایڈووکیٹ کے ذریعے عمران خان صاحب کو درخواست بھیجی تھی کہ پارٹی ممبران کو بے تحاشہ ناحق سزاؤں کے پیش نظر مجھے سیکریٹری جنرل کے عہدے سے ہٹ کر قانونی معاملات پر توجہ مرکوز کرنے دی جائے۔انہوں نے کہا کہ بانی پی ٹی آئی عمران خان نے میری درخواست منظور نہیں کی۔ان کا کہنا تھا کہ ہم نے پارٹی کے اندر اور باہر سے ہرقسم کے رقیق حملوں کو سہا ہے جس کا کوئی ملال نہیں، اپنی بھرپور وکالت کو پس پشت ڈال کر معاشی بے یقینی کو بخوشی قبول کیا۔ان کا مزید کہنا تھا کہ میں کوئی روایتی سیاست دان نہیں نہ جاگیردار نہ مل اونر ہوں تاہم میرا مختصر خاندان میرے ساتھ کھڑا ہے۔
