پاکستان تحریک انصاف کے بانی عمران خان نے آرمی چیف جنرل عاصم منیر کو تیسرا کھلا خط لکھ دیا۔پاکستان تحریک انصاف کے بانی چیئرمین عمرا ن خان کے وکیل فیصل چوہدری نے کہا ہے کہ عمران خان نے آج آرمی چیف جنرل عاصم منیر کو تیسرا خط لکھ دیا ہے جس میں مبینہ انتخابی دھاندلی کا معاملہ اٹھایا ہے اور دہشت گردی کی وجوہات پربات کی ہے۔اڈیالہ جیل کے باہر میڈیا سے گفتگو میں وکیل فیصل چوہدری کا کہنا تھاکہ بانی پی ٹی آئی عمران خان کا خط ڈیپ اسٹرکچرل ریفارمز، حکومتی پالیسیوں سے جمہوریت کو پہنچنے والے نقصان سمیت 6 نکات پر مشتمل ہے .فیصل چوہدری نے کہا کہ بانی پی ٹی آئی عمران خان نے آرمی چیف کو تیسرا خط جاری کیا ہے خط میں الیکشن فراڈ کے ذریعے اقلیت کو اکثریت پر ترجیح دینے کا معاملہ اٹھایا گیا ہے، بانی پی ٹی آئی نے خط میں کہا ہے منی لانڈرز کو اقتدار میں بٹھایا گیا ہے.فیصل چوہدری کے مطابق خط میں عمران خان نے کہا ہے کہ 18 لاکھ لوگ ملک چھوڑ گئے ہیں اور 20 ارب ڈالر کا سرمایہ ملک سے باہر چلا گیا ہے ہم نے جب حکومت چھوڑی معیشت کی گروتھ 6 اعشاریہ 4 فیصد تھی۔انہوں نے مزید کہا کہ بانی نے کہا ہے دہشت گردی رول آف لا نہ ہونے کی وجہ سے بڑھ رہی ہے.واضح رہے کہ 8 فروری کو عمران خان نے آرمی چیف جنرل عاصم منیر کو دوسرا کھلا خط لکھا تھا جس میں انہوں نے کہا کہ گن پوائنٹ پر 26ویں آئینی ترمیم کے ذریعے عدالتی نظام پر قبضہ کیا گیا جب کہ مجھے موت کی چکی میں رکھا گیا ہے اور 20 دن تک مکمل لاک اپ میں رکھا گیا جہاں سورج کی روشنی تک نہیں پہنچتی تھی۔اس سے قبل، 3 فروری کو عمران خان نے آرمی چیف جنرل عاصم منیر کو پہلی بار کھلا خط لکھ کر ان سے پالیسیوں میں تبدیلی کی اپیل کی تھی انہوں نے کہا تھا کہ ساری چیزوں کا نزلہ فوج پر گررہا ہے 2024 کا الیکشن، 26ویں آئینی ترمیم، پیکا ایکٹ فوج اور عوام کے درمیان فاصلے کی وجوہات ہیں
