ملک کے مختلف شہروں میں بارش اور برف باری سے سردی کی شدت میں اضافہ ہوگیا۔ملکہ کوہسار مری نے سفید چادر اوڑھ لی اور مختلف مقامات پر ایک فٹ تک برف پڑ چکی ہے۔مری انتظامیہ کی جانب سے سڑکوں کو ٹریفک کے لیے کلیئر کر دیا گیا ہے۔ محکمہ موسمیات کے مطابق آئندہ چند روز میں ملک کے بیشتر علاقوں میں موسم خشک رہے گا تاہم پہاڑی علاقوں میں ہلکی بارش اور برفباری کا امکان موجود ہے.مری اور گلیات میں برفباری کا سلسلہ تھم گیا جبکہ موسم بھی صاف ہونا شروع ہو گیا ہے.گزشتہ روز پاراچنار اور کالام میں کم سے کم درجہ حرارت منفی تین ڈگری سینٹی گریڈ ریکارڈ کیا گیا جبکہ مالم جبہ میں منفی ایک اور پشاور میں دس ڈگری سینٹی گریڈ درجہ حرارت رہا۔ دیر میں رات بھر بارش اور برفباری کے بعد صبح دھوپ نکل آئی لیکن سردی کی شدت برقرار رہی۔ بالائی علاقوں میں شدید برفباری کے باعث رابطہ سڑکیں بند ہو گئیں جس سے شہریوں کو مشکلات کا سامنا ہے۔چترال، دیر بالا، دیر زیریں، سوات، شانگلہ، ایبٹ آباد، ہری پور، مانسہرہ، بٹگرام اور تورغر میں تیز ہواؤں اور گرج چمک کے ساتھ بارش ہوئی جبکہ پہاڑی علاقوں میں برفباری کا امکان ظاہر کیا گیا ہے۔پشاور میں سحری کے بعد گہری دھند چھا گئی جس کے باعث حد نگاہ انتہائی کم ہو گئی۔ شدید دھند کے باعث پشاور اسلام آباد موٹروے کو ٹریفک کے لیے بند کر دیا گیا۔ شہری علاقوں سمیت نواحی علاقے بھی دھند کی لپیٹ میں رہے جبکہ اسکول جانے والے بچے مشکلات کا شکار رہے۔گزشتہ روز پشاور میں تین ملی میٹر، چترال میں چھ، رسالپور میں ستائیس، مالم جبہ میں پچپن، کاکول میں اڑتیس، بالاکوٹ میں اکتیس، تخت بھائی میں سترہ، ڈیرہ اور تیمرگرہ میں نو، دیر میں پانچ اور کالام میں اکیس ملی میٹر بارش ریکارڈ کی گئی۔ اسی طرح لاہور میں رات بھر بارش سے ٹھنڈ بڑھ گئی.بارش کے باعث لاہور میں موسم سرد ہوگیا جب کہ دن میں بھی وقفے وقفے سے بارش کا سلسلہ جاری رہنے کا امکان ظاہر کیا گیا ہے۔
