پاکستان نے تاریخ میں پہلی بار آئس ہاکی کے میدان میں شاندار کامیابی حاصل کرلی ہے۔امریکا میں ہونے والی لیٹم کپ ڈویژن تھری آئس ہاکی چیمپئن شپ میں پاکستانی ٹیم نے فائنل میں پیرو کو 6-1 سے شکست دے کرٹائٹل اپنے نام کرلیا۔پاکستان ٹیم نے پورے ایونٹ میں شاندار کارکردگی کا مظاہرہ کیا اور ناقابل شکست رہی۔ٹورنامنٹ میں پاکستان کی ٹیم نے شاندارکارکردگی کا مظاہرہ کرتے ہوئے اپنے تمام میچزمیں حریفوں کو آؤٹ کلاس کیا جبکہ فائنل میں بھی دفاع اورحملے میں بہترین ٹیم ورک نے فتح کو یقینی بنایا۔ٹورنامنٹ میں 17 ممالک اورخطوں کی 62 سے زائد ٹیموں نے شرکت کی جن میں ارجنٹینا، میکسیکو، پیرو، برازیل، لبنان، اسرائیل اورکوسٹاریکا شامل ہیں۔اسی چیمپئن شپ میں پاکستانی خواتین کی ٹیم نے بھی نمایاں کارکردگی دکھائی اورڈویژن ٹو مقابلوں میں کانسی کا تمغہ حاصل کیا۔پاکستان میں آئس ہاکی جیسے غیرروایتی کھیل میں یہ کامیابی ایک نئے دورکی شروعات سمجھی جا رہی ہے جس سے ملک میں سرد خطوں کے کھیلوں کو فروغ ملنے کی امید ہے۔
