امریکی صدر ڈونلڈ ٹرمپ کی موت سے متعلق جھوٹی افواہوں کے سوشل میڈیا پر ٹاپ ٹرینڈ نے ہلچل مچادی۔تاہم اب امریکی صدر کی موت کی افواہیں دم توڑ گئیں جب ان کی نئی تصاویر سوشل میڈیا پر جاری ہوئیں۔وائٹ ہاؤس کی جانب سے ٹرمپ کی صحت سے متعلق کوئی تشویشناک خبر بھی سامنے نہیں آئی تھی بلکہ حقیقت یہ ہے کہ ٹرمپ اپنے پوتے پوتیوں کے ہمراہ گالف کھیلنے میں مصروف تھے۔یہ افواہیں اس وقت مزید بڑھ گئیں جب وائٹ ہاؤس کی آفیشل لائیو اسٹریم میں ایک تکنیکی خرابی پیش آئی اور اسکرین پر عارضی طور پر پیغام ظاہر ہوا کہ ساتھ رہیں ہم جلد ہی دوبارہ لائیو ہوں گے محض چند لمحوں کے اس پیغام نے سوشل میڈیا پر مزید تجسس کو ہوا دی۔ افواہوں کے جنم لینے کی ایک اہم وجہ یہ بھی سامنے آئی کہ امریکی صدر چند دنوں سے سوشل میڈیا پر متحرک نظر نہیں آئے اور نہ ہی انہوں نے کوئی پریس کانفرنس کی تھی۔جبکہ صدر ٹرمپ کی معمول کے عوامی شیڈول سے غیرحاضری بھی افواہوں کو تقویت دیتی رہی خاص طور پر ایکس پر ٹرمپ کی مرنے کی خبر نے بہت تیزی سے ٹرینڈ کرنا شروع کر دیا۔ نائب صدر جے ڈی وینس کے ایک معمول کے بیان کو بھی سیاق و سباق سے ہٹ کر شیئر کیا گیا جس میں انہوں نے کہا تھا کہ اگر ٹرمپ مر جائیں تو میں ذمہ داری سنبھالنے کے لیے تیار ہوں۔یہ دراصل صدارتی جانشینی کے حوالے سے روایتی بات تھی مگر صارفین نے اسے سلپ آف ٹنگ یا پیشگی اشارہ قرار دیتے ہوئے وائرل کردیا۔یہ پہلا موقع نہیں ہے کہ صدر ٹرمپ کی موت کی جھوٹی خبریں پھیلائی گئی ہوں، 2022ء میں بھی اسی نوعیت کی افواہیں سوشل میڈیا پر ٹرینڈ کرچکی ہیں۔
